Aqtóbede ákimshilik sottyń bas mamany kásipkerdi aldaǵany úshin sottaldy
№2 Aqtóbe qalalyq sotynda Aqtóbe qalalyq mamandandyrylǵan ákimshilik soty keńsesiniń bas mamany Ǵalymjan Ábjaparovqa qatysty qylmystyq is qaraldy.
Sot materıalyna súıensek, 2018 jyldyń sáýir aıynda Aqtóbe qalalyq ІІB, Elek polıtsııa bóliminiń ýchaskelik polıtsııa qyzmetkerleri jeke kásipker Z.Qurbanovaǵa qatysty Ákimshilik quqyq buzýshylyq týraly kodekstiń «Kórineý jezókshelikpen aınalysý nemese jeńgetaılyq úshin úı-jaılar usyný» baby boıynsha hattama toltyryp, isti ákimshilik sotqa joldady.
Sot sheshimimen kásipkerge 360 myń teńgeden astam aıyppul salynyp, ony 30 táýlik ishinde tóleý mindetteledi. Ári kásipkerdiń saýna qyzmeti 1 aıǵa toqtatylady. Sol kezde sot otyrysynda hatshy retinde qatysqan Ǵalymjan Ábjaparov jeke bas paıdasyn oılap, kásipkermen kezdesedi. Kezdesýde aıyppuldy tóleıtin ýaqytta uzartyp, ishimdik satý lıtsenzııasyn sol kúıi qaldyrý úshin qyzmetine 150 myń teńge suraıdy.
Aqtóbe qalalyq mamandandyrylǵan ákimshilik soty keńsesiniń bas mamany Ǵalymjan Ábjaparovtyń bul talaby zańsyz ekenin túsingen jábirlenýshi Sybaılas jemqorlyqqa qarsy is-qımyl ulttyq bıýrosynyń Aqtóbe oblysy boıynsha departamentine aryz túsirdi. Sóıtip sottalýshy Ǵalymjan Ábjaparov myń teńge aqsha alý kezinde ustaldy.
«Ǵalymjan Ábjaparov Qylmystyq kodekstiń «Qylmysqa daıyndalý jáne qylmysqa oqtalý», «Alaıaqtyq» baptary kináli dep tanylsyn, oǵan ómir boıyna memlekettik qyzmette jumys atqarýǵa quqyǵynan aıyra otyryp 2 jyl merzimge bas bostandyǵynan aıyrý jazasy taǵaıyndalsyn. Ǵ.Ábjaparovqa qoldanylǵan sotqa kelý mindettemesi ózgertilip, sot zalynan qamaýǵa alynsyn. Jazasyn óteý orny bolyp qylmystyq-atqarý júıesiniń ortasha qaýipsiz mekemesi belgilensin», - dedi sýdıa Erlan Baqytjan.