Aqtóbede ákim mas kúıinde kólik júrgizgeni úshin jazalandy
AQTÓBE. QazAqparat - Aqtóbe oblysy, Muǵaljar aýdany, Qumjarǵan aýyldyq okrýginiń ákimi Ramazan Úrgenishbaev mas kúıinde kólik júrgizip, ustaldy. Ádep jónindegi keńes ákimge qatań sógis berdi, dep habarlaıdy QazAqparat tilshisi.
QR Memlekettik qyzmet isteri jáne sybaılas jemqorlyqqa qarsy kúres is-qımyl agenttiginiń oblystyq departamenti Ádep jónindegi keńes ótkizdi. Keńeste 7 másele qaraldy. Bul joly keńes músheleriniń aldyna Muǵaljar aýdany, Qumjarǵan aýyldyq okrýginiń ákimi Ramazan Úrgenishbaev keldi. Ákim Embi qalasynda óziniń «Nıssan Tırano» kóligin mas kúıinde aıdap, jol-patrýldik polıtsııasynyń qolyna túsken. Ákimshilik hattama toltyrylyp, ákim 3 jylǵa kólik júrgizý quqyǵynan aıyryldy.
«Men 6 jyldan beri ákim bolyp jumys isteımin. Bolǵan nárseni moıyndaımyn. Aldaǵy ýaqytta mundaı qaıtalanbaıdy dep sendiremin»,- dedi Ramazan Úrgenishbaev.
Ádep keńesi ákimge qatań sógis berdi.
