Aqtóbede ákim esebine barǵan І top múgedegi Saparbaevtan bata surady

Aqtóbe qalasynyń turǵyny Álibek Eleýsizov búgin qala ákimi Іlııas Ispanovtyń esep berý kezdesýine bardy. Eki aıaǵy joq, eki qoly múlde jumys istemeıtin múmkindigi shekteýli jan «Júrekten júrekke» eriktiler tobynda júrgenin, qaıyrymdy jandarmen birge jetim balalarǵa, ata-ananyń qamqorlyǵynsyz qalǵan sábıler men basyna is túsken adamdarǵa kómektesýge úles qosatynyn aıtty. Jastar men qaıyrymdy jandardyń bul toby aqtóbelikter úshin jaqsy tanys. Bir jyl boıy atqarǵan isti tizbektegen І top múgedegi Álibek Eleýsizov jergilikti kásipkerlerge, memlekettik mekeme qyzmetkerlerine alǵysyn aıtyp, oblys ákimi Berdibek Saparbaevtan bata surady.
 

«Barlyq adamnyń on eki múshesi saý bola bermeıdi. Allanyń bergenine eshkim qarsy tura almaıdy. Biraq ómirge kelgen soń ómir súrýge degen talpynys bolýy kerek. On eki múshem saý adam «men nege tańerteńnen keshke deıin jylaı beremin» dep oılanýy kerek. «Úkimet, jerlesterim, aǵaıyn-dostarym nege kómektespeıdi» dep ókpeleıtinder osy adamdarǵa qarap oılansa deımiz. Biz shamamyz kelgenshe múmkindigi shekteýli jandarǵa kómektesemiz, qoldaımyz. Múmkindik bolsa, memlekettik marapattardy alyp beremiz. Elimizde júregi keń, janyndaǵy jerlesterine qalaı kómektesemin degen adamdar kóp bolsa, qazaq, Qazaqstan jaman bolmaıdy. Saǵan densaýlyq bersin! Boıyńdaǵy qaıratyń, jigeriń ketpesin. Jan-jaǵyńda júregi keń azamattar kóp bolsyn!» - dedi oblys ákimi Berdibek Saparbaev.

Aıta keteıik, óńirde aqtóbelik jastardyń basyn biriktirgen «Júrekten júrekke» qaıyrymdylyq toby bar. Olar úsh jyldan beri jetim balalarǵa, áleýmettik jaǵdaıy tómen otbasylarǵa kómektesip keledi. Tipti, múgedekter arasynda sporttyq sharany jıi uıymdastyrady.