Aqtóbede «aqyldy» jaıaý júrginshiler ótkeli paıda boldy
AQTÓBE. KAZINFORM — Aqtóbede júrgizýshiler jaıaý júrginshiniń ótkelge jaqyndaǵanyn aldyn ala baıqaı alady.
Júıe adam joldyń júris bóligine shyqpaı turyp-aq jaryq sıgnalyn berip, jyldamdyqty tómendetý qajettigin eskertedi.
Qaladaǵy Ábilqaıyr han men Saǵadat Nurmaǵambetov kósheleriniń qıylysynda otandyq NAZAR avtonomdy jaıaý júrginshiler ótkeli tájirıbelik paıdalanýǵa berildi.
Júıe jaıaý júrginshi anyqtalǵan sátte avtomatty túrde iske qosylyp, qosymsha jaryqtandyrýdy jáne jol betine stop-syzyqtyń jaryq proektsııasyn shyǵarady.
Bul qarańǵy ýaqytta ótkeldiń kórinýin aıtarlyqtaı arttyryp, joldy kesip ótý qaýpi týyndaıtyn sátte júrgizýshilerdiń nazaryn kúsheıtedi.
Jobany engizýge ǵylymı-tehnıkalyq súıemeldeýdi «Qazaqstan jol ǵylymı-zertteý ınstıtýty» (QazjolǴZI) júzege asyrýda. Instıtýt mamandary atalǵan ýchaskede monıtorıng júrgizip, kólik quraldarynyń qozǵalys parametrlerin taldap, nysannyń qoldanystaǵy normatıvtik talaptarǵa sáıkestigin tekseredi.
Salalyq qurylymdardyń derekterine sáıkes, jol-kólik oqıǵalarynyń eń keń taralǵan túrleriniń biri — jaıaý júrginshini qaǵyp ketý. Mundaı jaǵdaılardyń negizgi sebepteri retinde jaryqtandyrýdyń jetkiliksizdigi jáne rettelmeıtin jaıaý ótkelderdiń jetkilikti deńgeıde kózge túspeýi atalady.
— Biz júıe ornatylǵannan keıin júrgizýshilerdiń ózderin qalaı ustaıtyndyǵyn baǵalaımyz. Kólik aǵynynyń jyldamdyǵyn, yqtımal qaqtyǵys jaǵdaılarynyń sanyn jáne ótkeldi paıdalaný qarqyndylyǵyn tirkeımiz. Monıtorıng qorytyndysy boıynsha bul sheshimniń tıimdiligine obektıvti baǵa beriledi, — dedi QazjolǴZI bas mamany Zakırjan Danııar.
Instıtýt sarapshylarynyń uqsas halyqaralyq tájirıbeni taldaýyna negizdelgen baǵalaýǵa sáıkes, belsendi jaryqtyq ındıkatsııany qoldaný jaıaý júrginshini qaǵyp ketý oqıǵalaryn orta eseppen 30–40 paıyzǵa deıin azaıtýy múmkin.
Qazirgi ýaqytta joba praktıkalyq synaq kezeńinen ótýde. Jınalǵan derekter taldanǵannan keıin respýblıkalyq jáne jergilikti mańyzy bar avtomobıl joldary jelisinde osyndaı avtonomdy ótkelderdi kezeń-kezeńimen engizý múmkindigi qarastyrylatyn bolady.
Aıta ketelik Almatydaǵy «aqyldy» baǵdarshamdar týraly jazǵan edik.