Aqtóbede ákesiniń kóligin aıdap ketken jasóspirim jol apaty kezinde kóz jumdy

AQTÓBE. KAZINFORM – Oqıǵa Aqtóbe qalasy Baýyrlastar turǵyn alabynda boldy. 13 jastaǵy jasóspirim aýrýhanaǵa jetkizilgenimen, kóz jumdy.

Oqıǵa 27 qazan kúni boldy. 13 jastaǵy jasóspirim ákesiniń avtokóligin ruqsatsyz alyp, eldimeken aýmaǵynda júredi. Sol kezde kólikti basqara almaı, jol jıegine aýdarylǵan. 

- Jol-kólik oqıǵasynyń saldarynan jasóspirim dene jaraqatyn alyp, medıtsınalyq mekemege jetkizildi. Alaıda dárigerlerdiń barlyq kúsh-jigerine qaramastan, kóz jumǵan. Qazirgi ýaqytta polıtsııa oqıǵanyń barlyq mán-jaıyn anyqtap jatyr. Polıtsııa ata-analardy kámeletke tolmaǵan balalarǵa kólik quraldaryn basqarýǵa jol bermeýge shaqyrady,- dedi Aqtóbe oblystyq PD bastyǵynyń orynbasary Ardana Saımaǵambetov. 

Qazirgi kezde óńirde «Qaýipsiz jol» jedel-aldyn alý sharasy ótip jatyr. Polıtsııa jol qozǵalysyn áýeden baqylaý úshin beınekameralary bar drondardy paıdalana bastady. 

- Oblysta jyl basynan beri 1641 jol apaty boldy. Jol apattarynyń 80 paıyzy júrgizýshilerdiń qarsy baǵyttaǵy qozǵalys jolaǵyna shyǵýy saldarynan tirkeldi. Áýeden baqylaý kezinde osyǵan mán berip jatyr. Úsh kún ishinde qarsy baǵyttaǵy qozǵalys jolaǵyna shyqqan 60 júrgizýshi anyqtaldy,- dep habarlady oblystyq PD baspasóz qyzmeti.

Eske salsaq, Aqtóbede eki kólik soqtyǵysyp, 12 adam qaza tapty. Oqıǵa Áıteke bı aýdany Belqopa aýyly mańynda boldy.