Aqtóbede ákesi men inisin pyshaqtap óltirgen qylmysker sottaldy
AQTÓBE. QazAqparat - Ákesi men inisin bir túnde pyshaqtap óltirgen Medet Tapaev 22 jylǵa bos bostandyǵynan aıyryldy, dep habarlaıdy QazAqparat tilshisi.
Aqtóbe qalasynyń 39 jastaǵy turǵyny Medet Tapaev mas kúıinde ákesi men inisin óltirgenin buǵan deıin habarlaǵan bolatynbyz . Ol ózin kóseýmen urǵan ákesi Serik Tapaevty birneshe ret pyshaqtap, arasha túspek bolǵan Manas Tapaevqa da pyshaq ala júgirgen. Іnisin aldymen pyshaqtap, keıin basyn sháınekpen uryp, mert qylady. Munyń bári anasynyń, qaryndasynyń, kelininiń kóz aldynda bolady. Keshe Aqtóbe oblystyq qylmystyq ister jónindegi mamandandyrylǵan aýdanaralyq sotynda sottalýshy Medet Tapaev sońǵy sózin aıtty. Ol memlekettik aıyptaýshy suraǵan 23 jyldyń óte kóp ekenin, qazir júregi aýyryp, demikpe dertine shaldyqqanyn alǵa tartty. Aqtóbe qalasyndaǵy saıajaılardyń birinde bolǵan qylmystyq oqıǵaǵa búgin núkte qoıyldy. Sot úkimi oqyldy.
«Medet Tapaev Qylmystyq kodekstiń «Adam óltirý» baby boıynsha aıypty dep tanylyp, 22 jylǵa bas bostandyǵynan aıyrylsyn. Jazasyn tótenshe qaýipti tártiptegi túzetý mekemesinde ótep, májbúrli túrde ishimdikten emdelsin»,- dedi sýdıa Altynbek Sabyrov.
Sonymen qatar, sottalýshy Medet Tapaev memleketke 1 mıllıon teńgeden astam materıaldyq shyǵyndy óteýi tıis. Al jábirlenýshi, Medet Tapaevtyń anasy ulynan moraldyq, materıaldyq shyǵyndy talap etken joq. Ári sottalýshynyń eshqandaı múlki joq bolmaǵandyqtan tárkileý júrgizilmeıdi.
Sot úkimi zańdy kúshine engen joq.
