Aqtóbede Ákeler kúnine arnalǵan merekelik sharaǵa júzdegen adam qatysty
AQTÓBE. KAZINFORM – Aqtóbede Ákeler kúnine oraı «Meniń ákem» atty merekelik baǵdarlama uıymdastyrylyp, qala turǵyndary men qonaqtaryn bir alańǵa jınady.
Іs-shara qalanyń ortalyq demalys oryndarynyń biri – «Astana» saıabaǵynda ótti. Onyń maqsaty – ákeniń otbasy men qoǵamdaǵy rólin dáripteý, áke mártebesin kóterý jáne otbasylyq qundylyqtardy nasıhattaý.
Merekelik baǵdarlamanyń negizgi bólikteriniń biri «Mereıli otbasy» ulttyq baıqaýynyń qalalyq kezeńi jeńimpazdaryn marapattaý rásimi boldy. Sonymen qatar bala tárbıesine eleýli úles qosyp júrgen ónegeli ákelerge qurmet kórsetildi.
Shara barysynda turǵyndarǵa arnalǵan túrli tanymdyq jáne oıyn-saýyq alańdary jumys istedi. Qonaqtar kitap kórmesin tamashalap, ulttyq jáne sporttyq oıyndarǵa qatysty.
«Dástúr» brendiniń aǵash pen bylǵarydan jasalǵan ulttyq qolóner buıymdarynyń kórme-jármeńkesi de kópshiliktiń qyzyǵýshylyǵyn týdyrdy.
Balalar úshin arnaıy oıyn alańy uıymdastyrylyp, ulttyq naqyshtaǵy fotoaımaqtar bezendirildi. Al «Áke murasy» alańynda qolónerdiń ártúrli túrleri boıynsha sheberlik sabaqtary ótkizildi.
Kelýshiler erekshe qyzyǵýshylyq tanytqan alańdardyń biri – «Qaharman ákeler mamandyqtary» kórmesi boldy. Onda quqyq qorǵaý organdary qyzmetkerleriniń, qutqarýshylardyń, órt sóndirýshiler men kınologtardyń qyzmeti tanystyryldy.
Sondaı-aq «Ákemmen sýret» art-aımaǵynda sýretshiler ákelerimen birge kelgen qatysýshylardyń portretterin salyp, estelik syılyqtar tartý etti.
Merekelik shara kontserttik baǵdarlamamen aıaqtaldy.
