Aqtóbede ákeler baıqaýy qorytyndylandy
AQTÓBE. QazAqparat - Aqtóbede «Meniń ákem» áleýmettik jobasy qorytyndylandy. Bıletten túsken qarjy Alǵa balalar úıinde tárbıelenip, keıin medıtsınalyq kolledjge oqýǵa túsken Irına Balashovanyń baspana alýǵa qajetti esepshotyna aýdaryldy, dep habarlaıdy QazAqparat tilshisi.
Aqtóbe oblysynda búgin «Meniń ákem» áleýmettik jobasy qorytyndylandy. Buǵan deıin habarlaǵanymyzdaı, baıqaýǵa barlyǵy 116 otbasy qatysty.
«Otan otbasynan bastalady. Otbasynyń qandaı bolatyny otaǵasyna baılanysty. Sondyqtan ákeniń abyroıyn arttyryp, mereıin ósiretin shara qoǵamǵa qajet. Áke - asqar taý. Bul sózdiń túbinde úlken maǵyna bar. Ókinishke qaraı, sońǵy jyldary otbasy qundylyǵy qoǵamda álsirep barady. Qoǵamdyq uıymdar, belsendi azamattar osy jaıdy dóp basyp, shara uıymdastyrdy. Jyl saıyn uıymdastyrsa, ákimdik qoldaý bildiredi», - dedi Aqtóbe oblysy ákiminiń orynbasary Erbol Nurǵalıev.
«Meniń ákem» baıqaýynda múgedek balalardy tárbıelep, jalǵyz ózi balasyn baǵyp otyrǵan ákeler «Qamqor áke» nomınatsııasy boıynsha marapattaldy. Barlyǵy 10 qatysýshyǵa arnaıy alǵys hat pen aqshalaı syılyq berildi. Al «Mereıli áke» nomınatsııasy boıynsha Orynaly Qýanyshbaev, «Batyr áke» nomınatsııasynda 90 jastaǵy Seıit Sútemgenov, «Bapker ákeni» Murat Sháripov, «Ónerli ákeni» Nurjan Esmýrzın, «Muǵalim aǵaı» nomınatsııasyn Raıymbek Qurmanǵazın jeńip aldy. «Tártip saqshysy» nomınatsııasy Májıt Qurmanǵazın ıelendi. «Hanshaıymdar ákesi» atalymynda bes qyz tárbıelegen Eldos Jumaǵulov úzdik shyqty. Jeńimpazdarǵa dıplom, qamshy jáne 100 myń teńge syılyq berildi. Al «Batyr áke» nomınatsııasynyń jeńimpazy 150 myń teńge syılyq aldy.
«Tyl ıgerýge qatysyp, uzaq jyl boıy mektepte muǵalim, dırektor qyzmetin atqardym. Ózim matematıka páninen sabaq berdim. Barlyǵy 46 jyl bilim salasynda eńbek etkenmin. Men 11 bala tárbıelep, ósirgen adammyn», - dedi Seıit Sútemgenov.
Aıta keteıik, ákeler baıqaýy kezinde aqtóbelik oqýshylar da hat jazǵan. Áıteke bı aýdany, Qarabutaq aýylynan kelgen hatta Tumargúl Nurtasqyzy óz ákesiniń ómirden ótkenin, biraq máńgi júreginde saqtaıtynyn jetkizgen. Al Muǵaljar aýdany, Birlik aýylynan Aıkórkem ákesi týraly jazyp, eki balany jalǵyz ózi baǵyp otyrǵanyn aıtqan. Eki oqýshy da arnaıy syılyqpen marapattaldy. Áleýmettik jobanyń qorytyndy esebi kezinde ıdeıa avtory Jańalyq Ahash bıletten jınalǵan qarjyny Alǵa balalar úıinde tárbıelenip, kolledjge oqýǵa túsken Irına Balashovaǵa tabys etti.
«Aqtóbe medıtsınalyq kolledjiniń farmatsııa fakýltetinde bilim alyp júrmin. «Meıirim» ortalyǵynda tegin turýǵa múmkindik berilgen. Alaıda ýaqyty kelgen soń ol jerden shyǵamyz. Qazir páter alýǵa qarjy jınap júrmin. «Meniń ákem» baıqaýyna kelip, jaqsy áser aldym. Biz úshin áke ol balalar úıiniń dırektory - Kenjeǵazy Baıǵazın. Ákemiz bizdi únemi qoldap, qamqorlyq kórsetip júredi», - dedi Irına Balashova.
