Aqtóbede aǵaıyndy Jubanovtar tutynǵan zattar kórmege qoıyldy
AQTÓBE. QazAqparat - Aqtóbeniń Embi qalasyndaǵy mýzeı aǵaıyndy Jubanovtarǵa tıesili zattardy kórmege qoıdy. Qundy jádigerler arasynda Ahmet Jubanov kıgen frak, shapan bar. Ǵazıza Jubanovanyń sahnaǵa arnalǵan kóılegi ákelindi. Sonymen qatar, Qudaıbergen Jubanovtyń latyn álipbıinde jazylǵan baıandamasy saqtalǵan, dep habarlaıdy QazAqparat tilshisi.
Aqtóbede Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda «Týǵan jerim - nurly elim» aktsııasy ótip jatyr. Aqtóbe oblysyndaǵy ár aýdan qundy jádigerleri men el ishinde atqarylyp jatqan isterin tanystyryp, mádenı-tanymdyq sharalar uıymdastyrý mindettelgen. Búgin Muǵaljar aýdany aǵaıyndy Jubanovtar tutynǵan zattar men olardyń ǵylymı eńbekteri jazylǵan kitaptardy kórmege qoıdy.
«Qudaıbergen Jubanovtyń jubaıy Raýshan Ospanqyzy kıgen ton mýzeıde bar. Jubanovtarǵa tıesili jádigerlerdiń basym bóligin Almatyda turatyn týǵan-týystarynan, páter mýzeıinen alyndy. Sonymen qatar, Ahmet Jubanovtyń «Zamana bulbuldary», «Qurmanǵazy Saǵyrbaev» kitaptaryna 60 jyldary óz qoltańbasyn qaldyrǵan eken. Bul da biz úshin qundy jádiger. Ahmet Jubanovtyń 1950 jyldary kıgen fragin jergilikti turǵyn tapsyrdy», - aǵaıyndy Jubanovtan memorıaldyq mýzeıiniń dırektory Ulbolsyn Muhambetova.
Kórmede Qaraqalpaq eliniń Ahmet Jubanovqa japqan shapany bar. Ǵazıza Jubanovanyń kontserttik kóılegi saqtaýly tur. Al Qubaıbergen Jubanovtyń latyn álipbıinde jazylǵan «Qazaq tiliniń grammatıkasy» atty eńbegi stýdentterdiń qyzyǵýshylyǵyn týdyrdy.
«1928 jyly Qyzylorda qalasynda ótken konferentsııa kezinde «Latyn emilesi jáne latyn álipbıine kóshý» týraly baıandama oqyǵan. Bizde «Qazaq tiliniń grammatıkasy» atty eńbegi bar. Jazba 1936 jyly jaryqqa shyqqan. Mýzyka salasyn zerttegen kezde «Qazaq mýzykasynda kúı janrynyń paıda bolýy» eńbegin latyn álipbıinde jazǵan. Qazirgi kezde bul biz úshin qundy qujattar», - dedi ekskýrsovod Nurlygúl Qojanova.
