Aqtóbede aǵashtan jáne qamystan salynǵan mektep máselesi qalaı sheshiledi
AQTÓBE. KAZINFORM — Jarty ǵasyr buryn salynǵan mektep sany — 80. Onyń ishinde beseýi aǵashtan, ekeýi qamystan salynǵan.
Aqtóbe oblysynda 400-den astam mektep bar. Onyń ishinde 80 mektep 1970 jyldary salynǵan.
— Bul mektepterdiń jaǵdaıy tolyq taldaýdan ótkizildi. Birqataryna qurylys jumysy josparlandy, birqataryna kúrdeli jóndeý jasalady. Bul jerdegi negizgi másele — oqýshylar sany, mektep bolashaǵy. Ótken oqý jylynyń aıaǵynda belgilengen normatıvke sáıkes kelmeıtin 80 mektep boldy. Jaz boıy aýdandar, aýyldar aýqymdy jumys istedi. Mektepterge balalardy shaqyryp, qabyldady. Sóıtip 50 mektepke 96 otbasynan 204 oqýshy bardy. Degenmen tek 15 mekteptiń ǵana bala sany sáıkestendirildi, — dedi Aqtóbe oblystyq bilim basqarmasynyń basshysy Bulbul Kúzembaeva.
Aqtóbe oblysynda aǵashtan salynǵan bes mektep bar. Onyń ekeýi Áıteke bı aýdanynda, úsheýi Yrǵyz aýdanynda. Ekeýiniń qurylysy 2027 jylǵa josparlanǵan. Bul mektepter bastaýysh jáne negizgi mektep bolyp salynady.
— Qamystan salynǵan eki mektep bar. Ekeýi de Yrǵyz aýdanynda. Qazirgi kezde tehnıkalyq tekserý júrgizip jatyrmyz. Aldaǵy ýaqytta sheshim qabyldanady. Sonymen birge óńirde samannan salynǵan 29 mektep bar. Ol barlyq aýdanda kezdesedi. Osy mektepterdiń ekeýiniń ornyna jańasy salynady. Ol 2027-2028 jyldarǵa josparlandy. Qalǵan mektep máselesi bala sany, onyń turaqtylyǵyna baılanysty sheshiledi. Qazir 60 oryndyq mekteptiń jobalyq quny 1 mlrd teńgeden asady. Máselen 1 mlrd teńgege 60 oryndyq mektep salynady, biraq ol 5 jyldan soń jabylyp qalady. Bul ekonomıkalyq jaǵynan da tıimdi emes. Odan biz sol qarjyǵa nege basqa mektepterge jaǵdaı jasamaımyz? Árbir aýdanda mektep janyndaǵy ınternat bar. Búginde ınternattardy tolyqtyrý 30 paıyzdan aspaıdy. Barlyq jaǵdaı jasalǵan, jańadan salynǵan, materıaldyq bazasy jaqsy. Biraq ata-analar balany bergisi kelmeıdi, — dedi Bulbul Kúzembaeva.
Buǵan deıin Aqtóbede qurylysy uzaqqa sozylǵan mekteptiń ashanasy istemeı turǵanyn jazǵan bolatynbyz. Sebebi Mekteptiń jeldetkishi iske qosylmaǵan. Saldarynan ashanada tamaq isteý múmkin emes. Ata-analar sport zal men ashana, oqý bólmelerindegi kemshilikti joıýdy talap etti.
