Aqtóbede aǵaly-inili eki adamdy ıt qaýyp aldy

AQTÓBE. QazAqparat – Aqtóbede 10 jastaǵy bala men 17 jastaǵy jigitti ıt qaýyp aldy. Qazir ekeýi de arnaıy em qabyldap júr, dep habarlaıdy QazAqparat tilshisi.

Oqıǵa Aqtóbe qalasy Maresev kóshesindegi kópqabatty jataqhananyń birinde boldy.

«Tórt bala úıge qaraı kele jatqan. Artqy jaǵynda ıt jetektegen bala erip júrgen. Balalardyń aıtýynsha ol «fas» dep aıtqan. Itte arnaıy tumyldyryq bolmaǵan. Bul keshki ýaqyt. Aıqaılaǵan daýysty estigende tómengi qabatqa qaraı júgirdim. Men kelsem balam birinshi qabatta qansyrap tur. Ony ıt 7 jerden tistegen. Birden jedel járdem shaqyrdyq. Negizi ıt júgirgende barlyǵy jan-jaqqa qaraı qashqan. Meniń 10 jastaǵy balama jarmasqanda 17 jastaǵy ulym ony qutqarmaq bolyp, arashalaǵan. Sol kezde ıt úlken ulyma da tarpa bas saldy», - dedi Temir aýdany Shubarshı aýylynyń turǵyny Aınagúl Muqasheva.

It balaǵa ǵana emes, arashalaǵan adamnyń bárine qarsy shapqan soń turǵyndardyń biri ony atyp tastaýǵa májbúr bolǵan.

«Sol kúni keshkilik teledıdar qarap otyrdym. Aýladan balalardyń aıqaıy, jylaǵan daýysy estildi. Ózim tórt balanyń ákesimin. Sol ýaqytta úsh balam dalada oınap júrdi. Terezeden bireýdiń eki balasyn ıt talap jatqanyn kórdim. Podezde turǵan eski oryndyqty qolyma ustap, oılanbastan syrtqa shyqtym. Sol kezde ıt talap jatqan eki balanyń aǵasy da syrtqa shyqty. Ekeýlep áreń ajyratyp aldyq. It bizge qarsy shaýyp tur. Esiktiń aldy tolǵan bala. Ashýly ıt podezd aldyndaǵy tsement tasty tistep, oıyp alǵan. Úıden zańdy túrde tirkelgen myltyǵymdy alyp shyqtym. Sebebi ózimniń úsh balam dalada oınap júr. Qarýmen shyqqanda pıtbýl ıt 3-4 aılyq balasymen dúkenge bara jatqan áıeldi qýyp bara jatqanyn kórdim. Aıqaılap artynan júgirdim. Balalardy qoqys tógetin orynǵa qaraı qýdym. It ózime qaraı atylǵan kezde attym. Aınalamda eshkim bolmady. Sol jerde polıtsııa, jedel járdem shaqyrdyq. Atýdan basqa amal bolmady»,- deıdi oqıǵa kýágeri Erlan Ámirǵalıev.

Eki balanyń ıtke talanǵanyn oblystyq veterınarııa basqarmasy da rastap otyr. Synama alynǵan.

«Itti atqan. Bizdiń mamandar barǵan kezde tiri boldy. Ony arnaıy orynǵa aparyp, egip, óltirdik. Eger atpaǵan kezde 10 kún ustaıtyn edik. Qazirgi kezde synamasy zerthanaǵa jiberildi. Nátıjesi endi shyǵady», - dedi Aqtóbe oblystyq veterınarııa basqarmasynyń basshysy Qusaıyn Sársenbaı. Polıtsııa bul isti tirkep, ıt ıesin anyqtady.

«Tekserý barysynda polıtsııa ıt ıesin anyqtady. Oǵan qatysty ÁQBtK-tiń «QR janýarlarǵa jaýapty qaraý salasyndaǵy zańnamasyn buzý» baby boıynsha ákimshilik is qozǵaldy», - dedi oblystyq PD baspasóz qyzmeti.

Eske salsaq, Aqtóbede 12 jastaǵy balany ıt talap óltirdi. Polıtsııa qylmystyq quramyn tappaı, is toqtatyldy.