Aqtóbede ádebı forým kezinde aqyn-jazýshylarǵa arnaıy syıaqy taǵaıyndaldy

AQTÓBE. QazAqparat – Aqtóbede «Ádebıet. Rýh. Qoǵam» ádebı forýmy ótti. Onda aqyn-jazýshylarǵa belgili tulǵalardyń stıpendııasy taǵaıyndaldy, dep habarlaıdy QazAqparat tilshisi.

Aqtóbe oblysyndaǵy ádebıet forýmyna bıyl elimizge tanymal aqyn-jazýshylar jınaldy.

Olardyń arasynda QR Jazýshylar Odaǵy tóraǵasynyń orynbasary Baýyrjan Jaqyp, Іlııa Jaqanov, Aqushtap Baqtygereeva, Tynymbaı Qarın, Asanáli Áshimov, Ómirzaq Ozǵanbaev, Júrsin Erman, Altynbek Qorazbaev bar. Forýmǵa jınalǵandarǵa oblys ákimi alǵysyn bildirdi.

«Mádenıet pen ádebıet – ult aınasy. Bıyl oblysta bul baǵytta kóptegen mańyzdy ister atqaryldy. Forým mádenıet pen qazaq ádebıetin damytýǵa baǵyttalǵan jumystyń bir parasy ǵana. Barlyq qatysýshylarǵa qoldaý bildirip, forýmǵa qatysqandary úshin alǵys aıtamyn. Bul azamattarymyzdyń ulttyq bolmysynyń qalyptasýyna oń yqpal etetini sózsiz», - dedi Aqtóbe oblysynyń ákimi Eraly Toǵjanov.

Aqyn-jazýshylar eli ishinde atqarylyp jatqan jumysqa toqtalyp, ádebıet forýmynyń jastarǵa berer taǵylymyn erekshe atap ótti.

«Bul forýmǵa jyl saıyn qatysyp júrmin. Rýhanııatqa kóp kóńil bólý kerek ekeni aıtpasa da túsinikti. Ekonomıka, qurylys dep túrli salanyń damýy týraly aıtylǵanymen, sana-sezim baılyǵy birinshi kezekte turýy tıis. Forýmnyń deńgeıin áli de arttyryp, jastardy qoldasa deımiz. Ulttyń rýhyn ádebıet, mádenıet kóteredi. Eldikti saqtaıdy, ulttyń eńsesin sharyqtatyn osyndaı dúnıe», - dedi Aqushtap Baqtygereeva.

Forým aıasynda ádebı baıqaýdyń 10 jeńimpazyna Tahaýı Ahtanov, Tobyq Jarmaǵanbetov, Úmbetbaı Ýaıdın, Saǵı Jıenbaev syndy kórnekti aqtóbelik aqyn-jazýshylar atyndaǵy shákirtaqy taǵaıyndady. Árbir jeńimpazǵa 1 mıllıon teńgeden berildi.

Sonyń biri Álıhan Jaqsylyqov óz shákirtaqysyna aqyn Ádil Botpanov týraly derekti fılm túsiretinin aıtty. Al aqyn Jumash Kenebaı Qýandyq Shańǵytbaev atyndaǵy syılyqtyń ıegeri atandy.

«Bul forýmǵa alǵash ret qatystym. Qazaq ádebıeti úshin úlken qamqorlyq dep bilemin. Basqa oblystardan qalamgerlerge degen mundaı qurmetti kórmedim. Talantty ardaqtap, syılaı bilgen Aqtóbege rızamyz», - dedi aqyn Halyqaralyq ıÝNESKO syılyǵynyń ıegeri, aqyn Jumash Kenebaı.

Sondaı-aq birneshe aqyn-jazýshy Qazaqstan Jazýshylar Odaǵyna múshe boldy.