Aqtóbede adamdarǵa nesıe rásimdetken emshiniń isi sotta qaralyp jatyr

AQTÓBE. KAZINFORM – Emshi 406 mln teńgeden astam shyǵyn keltirdi degen kúdikke ilikti. Sotta 90 jábirlenýshi bar.

№2 Aqtóbe qalalyq sotynda emshi Sulýshash Qazybaevaǵa qatysty is qarala bastady. Oǵan Qylmystyq kodekstiń «Alaıaqtyq» baby boıynsha aıyp taǵyldy.

Aıyptaý aktisine súıensek, ol 2018-2024 jyldar aralyǵynda 90 adamdy aldap soqqan. Ózin kásibı emshi jáne shyǵys halyq medıtsına magıstri ekenin aıtyp, úıindegi arnaıy em jasaýǵa arnalǵan kabınetinde adam qabyldaıdy. Sol jerde em jasaǵan. 

- S.Qazybaeva em alýǵa kelýshi azamattardyń kóp ekenin eskerip, qasaqana, tikeleı paıdaǵa kenelý nıetimen alaıaqtyq, ıaǵnı, eki nemese odan da kóp adamǵa qatysty birneshe ret bótenniń múlkin jymqyrý, aldaý jolymen ıemdenýdi oılaıdy. Óz oıyn júzege asyrý maqsatynda qaıtys bolǵan inisiniń atyna Áıteke bı aýdany Aqkól aýylynda meshit salamyn, sonymen qatar kámelet jasqa tolmaǵan qyzyn emdetý úshin Túrkııa eline baramyn dep aıtady. Sóıtip ózine em alýǵa kelgen tutynýshylarǵa ártúrli bankten nesıe alyp berýin ótinip, aqshasyn 2 aı ishinde tolyq jaýyp bere alatyn múmkindigi bar ekenin aıtyp sendiredi,- dedi memlekettik aıyptaýshy Gúlnazym Álıeva. 

Búgin sot otyrysyna jábirlenýshilerdiń bir bóligi keldi. Olar qalaı aldanyp qalǵanyn aıtyp berdi. 

- Men 2,5 mln, joldasym 2 mln teńge alyp berdi. Joldasym «qara tizimge» enbes úshin tólep jatyr. Qazir biz saıajaı aýmaǵynda turamyz. Qyzymyzǵa em izdep barǵan edik. Ol otyrmaıdy, júre almaıdy. Senip edik. 2024 jyldyń qańtar aıynan bastap 6 aı em alǵanbyz. Biraq eshqandaı nátıje bermedi,- dedi jábirlenýshi Gúlbaný Naýanova. 

Sulýshash Qazybaeva otbasyly, eki qyzy bar. Ol sottyń jabyq ótkenin qalaǵanymen, QR zańnamasy aıasynda sot ashyq ótip jatyr. 

Eske salsaq, Aqtóbede adamdardy aldaǵan emshi qańtar aıynda ustaldy. Oǵan Qylmystyq kodekstiń «Alaıaqtyq» babymen is qozǵalyp, tergeý júrdi.