Aqtóbede adam óltirmek bolǵan kúdiktiler ustaldy
AQTÓBE. QazAqparat - Aqtóbe polıtsııasy oq atqan kúdiktilerdi ustap, qylmystyq is qozǵady, dep habarlaıdy QazAqparat tilshisi.
Oqıǵa 16 mamyr kúni boldy. Aqtóbe qalasyndaǵy Sáńkibaı batyr kóshesinde ornalasqan monshada belgisiz bireýler oq atyp, Atyraý oblysynyń turǵyny aýrýhanaǵa tústi. Onyń jelke tusyndaǵy jumsaq tini jaralanǵan.
"Polıtsııa jedel qımyldap, Atyraý oblysynyń eki turǵynyn ustady. Kúdiktilerdiń birneshe kún buryn ǵana Aqtóbege kelgeni anyqtaldy. Jaldamaly páterden eki qarý tabyldy. Onyń bireýi Atyraýdyń Maqat aýdanynan urlanǵan. Osy derek boıynsha Qylmystyq kodekstiń "Adam óltirýge oqtalý" baby boıynsha is qozǵaldy. Kúdiktiler qamaýǵa alyndy. Qylmystyń sebebi anyqtalyp jatyr", - dep habarlady oblystyq PD baspasóz qyzmeti.
