Aqtóbede Ábilqaıyr han men Bopaı hanymdy ulyqtaý sharasy bastaldy
Aqtóbe oblysynyń ákimi Ońdasyn Orazalın Ábilqaıyr han men onyń áıeli Bopaı hanymdy eske alý sharalaryna qatysýǵa kelgen memleket jáne qoǵam qaıratkerleri Ómirzaq Ozǵanbaev, Jaýǵashty Nábıev, general-maıor Aıtqalı Isenǵulov, din qaıratkeri Serikbaı Oraz ben mádenıet qaıratkeri Sergeı Ázimovti qabyldady.
« Aqtóbe jerinde júzdeskenime qýanyshtymyn. Eske alý sharasyn ótkizý týraly bastama kóterilgende, qoldaý kórsetýdi jón kórdik. Basqasha bolýy múmkin emes edi. Ábilqaıyr han – bizdiń uly babamyz, onyń qyzmeti arqasynda qazaq halqy óziniń ulttyq bolmysyn, ádet-ǵurpyn, tarıhy men mádenıetin saqtaı aldy», - dedi oblys ákimi.
Negizgi is-shara Ábilqaıyr han jerlengen «Han molasy» memorıaldyq kesheniniń aýmaǵynda ótedi. Oǵan qatysý úshin Aqtóbe oblysyna Nur-Sultan, Almaty qalalary men elimizdiń kórshiles óńirlerinen qonaqtar keldi. Oblys ákimimen kezdesýde Ábilqaıyr hannyń urpaǵy, general-maıor Aıtqalı Isenǵulov aqtóbelikterdiń babalar rýhyna uqyptylyqpen qaraıtynyna rızashylyǵyn bildirdi.
«Biz aqtóbelikterdiń elimizdiń osy bóligindegi qazaq tarıhyn jandandyrýdyń bastamashysy bolǵanyn maqtan tutamyz», - dedi ol.
Mundaı is-sharalardyń ulttyq sana-sezimdi nyǵaıtýda mańyzy zor ekeni atap ótildi.
«Jastardyń ulttyq sana-sezimin oıatý, olardy kórnekti qazaq qaıratkerleri týraly bilimmen toltyrý asa mańyzdy. Bul baǵytta sizdiń óńirińizde Edige batyr, Eset batyr, Dosjan haziret týraly estelikterdi jańǵyrtý jáne saqtaý boıynsha úlken jumystar júrgizilýde. Bul jas urpaqqa aýadaı qajet», - dep atap ótti tarıh ǵylymdarynyń doktory , akademık Ómirzaq Ozǵanbaev. Sondaı-aq rejısser Sergeı Ázimov te óz pikirin bildirdi .
«Ábilqaıyr han óte qıyn ýaqytta úsh júzdiń basyn qosa aldy. Bizdiń zamanymyzda birlik sol kezdegideı mańyzdy, biraq ulttyq biregeıliksiz birlik bolmaıdy. Sondyqtan tarıhymyzdy, ony jasaǵandar týraly este saqtaý óte mańyzdy. Eske alý sharalary Ábilqaıyr hannyń adal serigi – Bopaı hanymǵa da arnalyp otyrǵany ádiletti. Han ólgen soń, onyń óliminiń óshin alyp, isin jalǵastyryp, uldaryn taqqa otyrǵyzdy. Ol uly qaıratker, dana dıplomat boldy», - de di ol .
