Aqtóbede Abaı atyndaǵy kórkemsóz oqý sheberleriniń respýblıkalyq baıqaýy ótti
AQTÓBE. QazAqparat - Aqtóbege kórkemsóz oqý sheberleri jınaldy. Abaıdyń qara sózderi men shyǵarmalarynan úzindi oqyǵan jastar elimizdiń ár óńirinen jınaldy, dep habarlaıdy QazAqparat tilshisi.
Qazaqstan halqy tilderi kúni merekesi aıasynda Aqtóbede Abaı atyndaǵy kórkemsóz oqý sheberleriniń respýblıkalyq baıqaýy ótti. Baıqaýǵa elimizdiń batysy men shyǵysynan, soltústigi men ońtústiginen 15 úmitker qatysty. Olar Abaıdyń qara sózderinen, óleńderinen, «Abaı joly» roman-ekopeıasynan úzindi oqydy.
«Kórkemsóz oqý baıqaýlaryna jıi qatysamyn. Ózim 8 synypta oqyp júrgen kezde Abaı Qunanbaıulynyń óleńderin, qara sózderin jatqa oqydym. Adamǵa rýh beretin, dúnıetanymyńdy keńeıtetin, ómirge degen kózqarasyńdy qalyptastyratyn shyǵarmalary men úshin úlken tárbıe quraly. Abaı atyndaǵy kórkemsóz oqý sheberleriniń respýblıkalyq baıqaýynda 10 qara sózdi oqydym. Sahnaǵa arnaıy daıyndalyp, at ábzelderin, kitaptardy alyp shyqtym. Bul arqyly men qara sózdegi bala tárbıesi týraly oıdy jan-jaqty jetkizgim keldi»,- dedi Aqtóbe oblysynan shyqqan úmitker Aldııar Altynbek.
Abaı atyndaǵy kórkemsóz oqý sheberleriniń respýblıkalyq baıqaýyna qoǵam qaıratkeri Amangeldi Aıtaly, Sh.Shaıahmetov atyndaǵy tildirdi damytý respýblıkalyq úılestirý-ádistemelik ortalyǵy dırektorynyń kómekshisi Orazgúl Asanǵazy qazylyq etti. Aqmola oblysynan kelgen Gúlzat Qaıyrgeldi bas júldeni jeńip aldy. І orynda Qostanaı oblysynyń kórkemsóz oqý sheberi Dáldi Haırat, ІІ orynda mańǵystaýlyq Álibek Taǵaberdın, ІІІ orynda Shyǵys Qazaqstannan kelgen Meıirjan Álbekov pen pavlodarlyq Orazbek Bahatbek. Jeńimpazdar arnaıy dıplomdar, alǵys hattarmen jáne qarjylaı syılyqtarmen marapattalady.
