Aqtóbede abaqtyda jazasyn óteýshiler jyljymaly úı qurastyryp shyqty
AQTÓBE. QazAqparat - Aqtóbe qalasynda abaqtyda jazasyn óteýshilerdiń kórme-jármeńkesi ótti. Qala turǵyndary men kásipkerlerdi jyljymaly úı qyzyqtyrdy, dep habarlaıdy QazAqparat tilshisi.
Aqtóbe qalasynda búgin erekshe kórme uıymdastyryldy. Oblystaǵy qylmystyq atqarý júıesi departamentine qarasty úsh abaqtyda jazasyn ótep otyrǵandar óz qoldarymen jasaǵan buıymdaryn satýǵa shyǵardy. Qazirgi kezde túrmedegi 16 mekemede 500-den astam jazasyn óteýshi jumys isteıdi. Olar temir, temir-beton, aǵashtan ydys-aıaq, balalardyń oıyn alańyna qajetti buıymdar men sporttyq zattardy jasaǵan. Tipti, túrmede otyrǵandar arnaıy tapsyryspen kıim tigedi. Aqtóbelikterdi aǵashpen qaptalǵan jyljymaly úı qyzyqtyrdy.
«Jyljymaly úıdiń qańqasyn Germanııadan ákelgen bolatynbyz. Keıin ony jazasyn ótep otyrǵandarǵa berip, óz ıdeıamyzben keremet úı jasadyq. Onda jylý bar. Jýynatyn jeri qarastyrylǵan. Tamaq pisirýge bolady, tońazytqyshy qoıyldy. Jatyn orny men as ishýge arnalǵan keńistik te jetkilikti. Bir jyl boıy jasaldy», - dedi kásipker Dmıtrıı.
Aqtóbe oblystyq qylmystyq atqarý júıesi departamentiniń bastyǵy Ernat Aqyljanovtyń aıtýynsha, jyljymaly úıdiń quny 1,5 mıllıon teńge dep baǵalanǵan. Ony Aqtóbe oblysy Muǵaljar aýdany Jem qalasynda jazasyn ótep otyrǵandar jasap shyqty.
