Aqtóbede 92 jastaǵy qarııa balalarynan alıment talap etti

AQTÓBE. KAZINFORM – Aqtóbede 92 jastaǵy qarııa balalarynan alıment óndirip alý úshin sotqa talap aryz túsirdi. Sot isti qarap, 9 balanyń 4-eýinen alıment óndirý týraly sheshim shyǵardy. 

Іs Aqtóbe qalalyq sotynda qaraldy. Іs materıalyna súıensek, talap qoıýshynyń 9 balasy bar. Biraq ol bireýiniń qolynda turady, sondyqtan 8 baladan alıment óndirýdi surady.

– Batyr ana óziniń 92 jasta ekenin, qartaıǵanda sozylmaly aýrýy kóbeıip, qınalyp júrgenin jazǵan. Talap qoıýshy D. óziniń talap aryzynda kishi qyzy Z.-men birge turatynyn, onyń materıaldyq kómek kórsetip júrgenin aıtty. Sondyqtan tek 8 balasynan alıment óndirýdi surady. Іsti qaraý barysynda jaýapkerler anasyna kómek kórsetetinin aıtqanymen, naqty dáleldeı almady. Al úshinshi tulǵa, ıaǵnı, kishi qyzy beınematerıaldy qosa ákeldi. Sonymen birge talap qoıýshy balalaryn 5-6 jyldan beri kórmegenin aıtty. Óz kezeginde jaýapkerler kishi qyzdyń úıge kirgizbeı júrgenin alǵa tartty. Biraq bul ýáj dáleldenbedi. Sot muny mindetterinen jaltarýdyń bir ádisi retinde qarastyrdy. Talap qoıýshynyń balalarynan alıment alýǵa quqyǵy bar ekenin anyqtady. Alaıda olardyń tórteýi zeınetker, alıment óndirýge jatpaıdy, - dep habarlady Aqtóbe qalalyq sotynyń baspasóz qyzmeti. 

Sot Azamattyq kodekstiń 145 baby 3 jáne 4 tarmaqtaryn negizge alyp, 4 jaýapkerdiń árqaısysynan anasynyń paıdasyna 7 AEK alıment óndirdi. Sot sheshimi zańdy kúshine engen joq. 

Eske salsaq, Aqtóbe oblystyq TJD Daǵdarys jaǵdaılary basqarmasy jedel kezekshisiniń kómekshisi tún ishinde «meni óltirip jatyr» degen áıeldiń sózine mán bermeı, eskerýsiz qaldyrǵany úshin sottaldy. Ol 2 jylǵa bas bostandyǵynan aıyryldy.