Aqtóbede 900 adam turatyn eki aýylǵa gaz berildi
AQTÓBE. KAZINFORM – Aqtóbede 179 úıi bar Altyqarasý jáne 81 úıi bar Eńbekshi aýylyna gaz berildi. Bul jumystarǵa 1,8 mlrd teńge jumsaldy.
Aqtóbe oblysynda aýyldardy gazben qamtý jumysy jalǵasyp jatyr. Bul joly Temir aýdanynyń Altyqarasý jáne Eńbekshi aýyldaryna gaz berildi. Eki aýylda da qurylys jumystary eki jyl buryn bastalyp, Altyqarasýda qubyr tartý jumysy tez aıaqtaldy.
«Altyqarasý eldimekenine gaz qubyryn tartý jumysy 2022 jyly aıaqtaldy. Alaıda ol jaqqa gaz Eńbekshi aýyly arqyly beriletin bolyp, kesh qosylyp tur. Sebebi Eńbekshi aýylyndaǵy jumysty mindetine alǵan merdiger ýaqytynda aıaqtalmaı, osy kúnge deıin sozyldy. Úsh aı kúndiz-túni jumys istep, qurylys aıaqtaldy», - dedi merdiger mekeme basshysy Qarjaýbaı Alıkýlov.
Aıta keteıik, Altyqarasýdaǵy qurylys jumystaryna 691 mln teńgeden astam qarjy bólinip, jumsaldy. Munda 179 úıde 615 adam turady. Al Eńbekshi aýylynda gaz tartý jumysyna 1,1 mlrd teńge bólindi. Munda 81 úıde 395 adam turady.
«Biz bul kúndi uzaq kúttik. Aýylǵa gaz jetkizilgenine óte qýanyshtymyz. Kún sýytqany belgili. Osy oraıda úılerge gazdyń qosylýy jaı ǵana qýanyshty oqıǵa emes, sonymen qatar ýaqytyly jasalǵan jaǵdaı bolyp otyr», - dedi Eńbekshi aýylynyń turǵyny Saıyn Boranqulov.
Aıta keteıik, bıyl Aqtóbede 27 aýylǵa gaz beriledi. Bul jobalar 2025 jyly eldi mekenderdiń 64 paıyzyn, sondaı-aq oblys halqynyń 97,2 paıyzy gazben qamtamasyz etýge múmkindik beredi.
