Aqtóbede 90 jastaǵy qarııany qutqaryp qalǵan órt sóndirýshi marapattaldy
AQTÓBE. QaZAqparat – Aqtóbede Táýelsizdik kúni oblystyq tótenshe jaǵdaılar departamenti ofıtserlik bal ótkizdi. Onda 90 jastaǵy qarııany órtten aman alyp shyqqan qyzmetker marapattaldy, dep habarlaıdy QazAqparat tilshisi.
Aqtóbe oblystyq tótenshe jaǵdaılar departamenti mereke kúni qyzmetkerlerdi marapattady. Eki qyzmetker «Halyq alǵysy» medalin aldy. Sonymen birge Tótenshe jaǵdaılar mınıstri atynan alǵys hat alǵan qyzmetkerler bar. Muǵaljar aýdany, Qandyaǵash qalasyndaǵy órt kezinde 90 jastaǵy qarııany aman alyp qalǵan Samrat Meırambek alǵysqa bólendi.
«Oqý ornynyń sport fakýltetin bitirgenmin. Otan aldyndaǵy boryshymdy da ótedim. 2019 jyly órt sóndirýshi, qutqarýshylar qataryna qosyldym. Al oqıǵa týraly aıtar bolsam, Qandyaǵash qalasyndaǵy páterlerdiń birinen órt shyqqany týraly habarlama tústi. Túnde birden oqıǵa ornyna barǵan kezde esik ashylmady. Baspaldaq arqyly terezeni syndyryp páterge kirip, qarııany dalaǵa alyp shyqtyq. Múgedek adam ózi tura almady. Keıin osy vıdeo áleýmettik jelige tarap ketti. Adamǵa kómekteskenim úshin ata-anam qýandy. Bul bizdiń mindetimiz, erlik emes. Osy salany tańdaǵan adam batyl bolýy kerek», - dedi órt sóndirýshi Samrat Meırambek.
Aıta keteıik, bıyl 11 aıda 3500-den astam shyqyrýǵa barǵan qyzmetkerler 451 adamdy aman alyp qaldy. Al myńnan astam adam qaýipsiz jerge kóshirilse, 200-den astam adamǵa alǵashqy medıtsınalyq kómek kórsetildi.
