Aqtóbede 9 jastaǵy balany kórshisiniń ıti qaýyp aldy

Aqtóbe qalasy mańyndaǵy Qýraıly aýylynda 9 jastaǵy balany ıt qaýyp aldy.

«Oqıǵa keshe boldy. Kórshisiniń nemis tuqymdas ıti sheshilip ketip, balany talap tastaǵan. Iesine Ákimshilik quqyqbuzýshylyq týraly kodekstiń 408-baby 2-bóligimen hattama toltyryldy»,- dedi oblystyq PD baspasóz qyzmetiniń jetekshisi Erbolat Sarqulov. Qazirgi kezinde ýchaskelik polıtsııa qyzmetkerleri qala mańyndaǵy Qurshasaı, Qyzyljar aýylynda ıt ıelerine eskertý jasap, 50-den astamy ákimshilik hattama toltyrdy, adamdar jaýapqa tartyldy. Bul jumys Qýraıly aýylynda da júrgiziledi.
Aıta keteıik, osydan bir apta buryn polıtsııaǵa 43 jastaǵy turǵyn habarlasyp, dál osy aýyl mańyndaǵy ónerkásip aýmaǵynda ózin alabaı tuqymdas ıttiń qaýyp alǵanyn aıtty. Ol birden aýrýhananyń jansaqtaý bólimine jetkizilgen.
«Bul jaǵdaıǵa der kezinde den qoıǵan Almaty aýdany №4 qalalyq polıtsııa bóliminiń jergilikti polıtsııa qyzmeti bóliminiń qyzmetkerleri Qýraıly aýylynyń nerkásiptik aýmaǵyn tekserý kezinde aq tústi alabaı tuqymdy ıtti taýyp, ıesin anyqtady. QR ÁQBtK-niń «Aýyl sharýashylyǵy janýarlaryn jaıý erejelerin, ıtter men mysyqtardy asyraý jáne serýendetý erejelerin, qańǵybas ıtter men mysyqtardy aýlaý jáne joıý erejelerin buzý« baby boıynsha ıt ıesine ákimshilik hattama toltyrylyp, 10 AEK (otyz myń alty júz otyz teńge) kóleminde aıyppul salyndy. Sondaı-aq, polıtseıler aldaǵy ýaqytta mundaı faktilerge jol bermeý úshin úı ıesimen profılaktıkalyq áńgime ótkizdi. It ıeleri úı janýarlary basqa turǵyndarǵa qaýip tóndirýi múmkin ekenin túsinýi kerek. Mundaı jaǵdaıda adamdar, ásirese balalar, zardap shegýi múmkin»,- dedi Erbolat Sarqulov.