Aqtóbede 9 jasar qyz oıyn-saýyq kesheninde qolynan aıyryla jazdady

AQTÓBE. KAZINFORM – Oqýshynyń qoly men saýsaq eti ǵana emes, sińiri de kesilgen. Oqýshy 5 kún aýrýhanada jatty. Polıtsııa atalǵan oqıǵaǵa baılanysty tergeý júrgizip jatyr. 

Ózin Arý dep tanystyrǵan aqtóbelik osydan 2 aı buryn bolǵan oqıǵanyń mán-jaıyn áleýmettik jeli arqyly habarlady. Onyń habarlaýynsha, 9 jastaǵy qyzy balalarǵa arnalǵan oıyn-saýyq ortalyǵynda oınap júrip, jaralanady. Kótergish qurylǵynyń ishinde qalǵan qolynan lıtr qan ketip, ata-anasy qyzyn dereý aýrýhanaǵa jetkizgen. 

– Naýqas kópsalaly oblystyq balalar aýrýhanasynyń qabyldaý bólimine óz betinshe keldi. Shuǵyl kómek kórsetilgennen keıin (sińirdi tigý) travmatologııa bólimine jatqyzyldy. 5 táýlikten keıin ambýlatorlyq emin jalǵastyrý úshin aýrýhanadan shyǵaryldy. Aýrýhanadan shyqqan kezde saýsaqtary qımyldap, azdap búgilip turdy. Qan júrip tur. Maýsym aıynda «Darý» klınıkasynda ońaltý emin aldy, - dep habarlady oblystyq densaýlyq saqtaý basqarmasynyń baspasóz qyzmeti. 

Osy oqıǵadan soń polıtsııa Qylmystyq kodekstiń «Qaýipsizdik talaptaryna saı kelmeıtin taýarlardy shyǵarý nemese satý, jumystardy oryndaý ne qyzmetter kórsetý» baby boıynsha sot aldy tergeýdi bastady. Taldaý júrgizilgennen keıin ǵana protsestik sheshim qabyldanady.

Aıta keteıik, Qylmystyq kodekstiń 306 baby 1 bóligi boıynsha belgili bir laýazymdardy atqarý nemese belgili bir qyzmetpen aınalysý quqyǵynan úsh jylǵa deıingi merzimge aıyrylady. Zań boıynsha 160 AEK kóleminde aıyppul tóleıdi nemese 160 saǵat qoǵamdyq jumysqa tartylady. Tipti 40 táýlikke deıingi merzimge qamaqqa alýynýy múmkin. 

Buǵan deıin balalar úshin qurylysy bitpegen nysan, qırap qalǵan ǵımaratpen qatar qazir qudyqtar da qaýipti bolyp turǵany týraly jazyldy.