Aqtóbede 9-synyp oqýshysynyń ólimine qatysty is sotta qarala bastady
AQTÓBE. KAZINFORM – Qopa aýylyndaǵy mektep oqýshysy Nurjan Sydyqtyń ólimine qatysty is sotta qarala bastady. Sot protsesi jabyq ótedi.
Aqtóbe oblystyq kámeletke tolmaǵandar isteri jónindegi mamandandyrylǵan aýdanaralyq sotynda mektep oqýshysyna qatysty istiń alǵashqy tyńdaýy ótti. Oǵan sottalýshylar men jábirlenýshiler qatysty. Sýdıa Joǵarǵy sottyń qaýlysy men Qylmystyq protsestik kodekstiń 24 baby 1 bóligine súıenip, sottyń jabyq túrde ótýin durys sanady. Al jábirlenýshi tarap istiń ashyq ótkenin qalady.
— Biz, Nurjannyń týǵandary men jaqyndary, sottyń ádil ótýin talap etemiz. 2024 jyldyń 2 qyrkúıegi kúni Aqtóbe oblysy Temir aýdany Qopa aýylynda joǵary synyp oqýshylary meniń baýyrymdy aıaýsyz soqqyǵa jyqty. Sol soqqynyń saldarynan baýyrym kóz jumdy. Oqıǵa kezinde onyń qasynda 18 oqýshy bolǵan. Olardyń qatarynda sport sheberleri de bar. Ókinishke qaraı balalardy qorqytyp-úrkitip ata-anasyna habar bermegen. Bala sol jerde jan tapsyrdy, jedel járdem kelgenshe ólip ketti. Alǵashynda kúdiktilerge qatysty tergeý Qylmystyq kodekstiń «Adam óltirý» baby boıynsha qaraldy. Keıin 106 baptyń 3 bóligine aýystyryldy. Bul sheshimniń qandaı negizde qabyldanǵany bizge belgisiz. Birneshe ret barlyq jerge aryzdandyq, — dedi marqum Nurjan Sydyqtyń apasy Mereke Qalybaeva. Onyń aıtýynsha, 6 oqýshy aıyptalýshy, al 9 synyptyń 7 oqýshysy, 10 synyptyń 5 oqýshysy jábirlenýshi. Bul — tek meniń baýyrymnyń isi emes, búkil qoǵam úshin óte aýqymdy másele. Eger mundaı qatygezdikke kóz juma qaraı bersek, erteń kez kelgen ata-ana osy jaǵdaıǵa dýshar bolýy múmkin. Biz zań organdarynan isti ádil tergep, kinálilerdiń ashyq túrde laıyqty jazasyn alýyn talap etemiz. Anasy kúnde aýyrady. Aıyptalýshy balalardyń ata-analary kúnde jazady. Aýyldyń ortaq chaty arqyly keshirim surap jazady. Ol bolmaıdy, — dedi Mereke Qalybaeva. Іs 23 tomnan turady.
Eske salsaq, byltyr Aqtóbeniń Qopa aýylynda janjaldan soń oqýshy kóz jumǵan edi. Bala quqyqtary jónindegi ýákil Dınara Zakıeva Aqtóbe oblysy Qopa aýylyna baryp, mektepte saýalnama júrgizip, álimjettik bar ekenin anyqtaǵan edi. Qylmystyq isti tergeý kezinde eki ret baby aýystyryldy. Qańtarda tergeý aıaqtalyp, is tanysý úshin taraptarǵa berilgen edi.