Aqtóbede 9 balanyń anasy egiz ul men qyzdy ómirge ákeldi
AQTÓBE. QazAqparat -Aqtóbe oblystyq perenataldyq ortalyǵynda 38 jastaǵy kelinshek egiz ul men qyzdy ómirge ákeldi. Dárigerlerdiń aıtýynsha, bul sırek kezdesetin qýanyshty jańalyq, dep habarlaıdy QazAqparat tilshisi.
Aqtóbe oblystyq perınataldyq ortalyǵynda 16 maýsym kúni 9 balasy bar Ásem Bekmaǵambetova egiz ul men qyzyn ómirge ákeldi. Akýsher-gınekolog Gúlstan Qabylovanyń aıtýynsha, aıy-kúni jetip ómirge kelgen eki balanyń da densaýlyǵy jaqsy, jas ana da din aman. QazAqparat tilshisi perzenthanaǵa baryp, egizin baýyryna basqan Ásem Bekmaǵambetovanyń jaǵdaıymen tanysyp keldi.
«Meniń 9 balam bar. Onyń ekeýi ul, jeteýi qyz. ÝDZ-ge túsken kezde egiz ekenin bilip, ózimiz tańǵaldyq. Qyzymyzdyń aty Aısha, ulymyzdyń aty Mustafa. Ekeýine de esimdi ákesi berdi. Salmaqtary úsh keliden asady. Únemi perınataldyq ortalyqqa kelip, osy jerde bosanamyn. Jyl ótken saıyn medıtsına salasy damyp, jańaryp jatyr. Bári jaqsy, ózimniń de densaýlyǵyma qarap, dárigerler kómektesip turady», - dedi Á. Bekmaǵambetova.
Jas ana jumys istemeıdi, balalarynyń kútimimen úıde otyr. Al kúıeýi vahtalyq ádispen Atyraýda eńbek etedi. Osydan 15 jyldan astam ýaqyt buryn Atyraýdan Aqtóbege qonys aýdarǵan olar ıpotekalyq nesıege úı aldy.
«Úıde jalǵyz tabys kózi bar. Ipotekany tóleý qıyn ekeni ras. Bir ret qaıta rásimdep, jylyn uzartýǵa týra keldi. Balalarymyzdyń úlkeni ýnıversıtettiń aqyly bóliminde oqıdy. Ekinshi balamyz medıtsına salasyn tańdaǵysy keledi. Al kishkentaıy 2 jarym jasta. Men de, joldasym da kópbalaly otbasynan shyqqanbyz. Balalarymyz bir-birin qaraıdy, úıdiń sharýashylyǵyna kómektesedi ári óte baýyrmal»,- dedi Ásem Bekmaǵambetova.
