Aqtóbede 9 adamnan quralǵan qylmystyq top quryqtaldy, onyń ishinde eki áıel bar
ASTANA. 1 tamyz. QazAqparat - Aqtóbe oblysynyń Іshki ister departamenti krımınaldyq polıtsııa qyzmetkerleri osy óńirde urlyq jasaýmen aınalysqan (onyń ishinde páter urlyǵymen) qylmystyq topty quryqtady.
Bul týraly ІІM baspasóz qyzmetinen habarlandy.
Oblystyń 9 turǵynynan quralǵan qylmystyq toptyń quramynda 18-28 jas aralyǵyndaǵy 2 áıel bar bolyp shyqty. Al topty buǵan deıin tonaýshylyqpen aınalysyp, sotty bolǵan azamat basqaryp kelgen. «Qazirgi ýaqytta top músheleri aǵymdaǵy jyldyń maýsym-shilde aılarynda jasalǵan 14 urlyqty moıyndady, ondaǵy shyǵyn shamamen 820 myń teńgeni quraıdy. Qylmystyq toptyń kóshbasshysy men 5 qatysýshy-kúdiktiler ustaldy. Qalǵandaryn ustaý boıynsha sharalar jalǵasýda», - delingen baspasóz baıanynda.
Sonymen qatar, ótken aptada Qostanaı qalasynda krımınaldyq polıtsııa qyzmetkerleri mamyr aıynyń sońynda kompıýterlik klýbqa qaraqshylyq shabýyl jasaǵan úsh jergilikti turǵyndy ustady. Ustalǵandardan belgi berý tapanshasy men sýyq qarý jáne betperdeler tárkilengen. Qazirgi ýaqytta kúdiktilerdiń osyǵan uqsas ashylmaǵan qylmystarǵa qatystylyǵyn tekserý boıynsha is-sharalar júrgizilýde.
