Aqtóbede 882 medıtsına qyzmetkeri ústemeaqy aldy
AQTÓBE. QazAqparat – Aqtóbelik dárigerler júktemege saı ústemeaqy aldy, dep habarlaıdy QazAqparat tilshisi.
Prezıdent Qasym–Jomart Toqaevtyń tapsyrmasyna saı medıtsına qyzmetkerlerine ústemeaqy taǵaıyndalyp jatyr. Aqtóbe oblysy boıynsha júktemege baılanysty 882 maman arnaýly ústemeaqy aldy.
«Oblys boıynsha 117 mıllıon teńge kóleminde ústemeaqy tólendi. Onyń ishinde ınfektsıonıster eń kóp qarjy aldy. Jedel járdem qyzmetiniń brıgadasyna júktemesine oraı berildi. Óńirdegi jedel járdemde 54 brıgada jumys istep tur. Sonyń 24-i koronavırýs ınfektsııasyna qarsy kúres jumystaryna arnaıy bekitildi. Medıtsına qyzmetkerleriniń bári daıyndyqtan ótken. Tipti, arnaıy qorǵanys kıimin kıip, sheshý kezinde ereje saqtaýy tıis. Oblystyq shtab sheshimimen jergilikti bıýdjetten qosymsha qarjy qarastyryldy. Jedel járdemdegi mamandarǵa 100 myń teńge kóleminde bir rettik qoldaý bolady», - dedi oblystyq densaýlyq saqtaý basqarmasynyń basshysy Áset Qalıev jergilikti arnada ótken tikeleı efır kezinde.
Aıta keteıik, qazir koronavırýs ınfekıtsııasyna shaldyqqandardy emdep júrgen dárigerler arnaıy demalys ortalyǵyna ornalastyryldy. Olar úılerine barmaıdy, aýysymda tynyǵady, biliktiligin arttyrady.
«Otbasyna qaýip tóndirmes úshin biz olardy oqshaýlap, demalys ortalyǵyna ornalastyrǵan edik. Kásipker kómek berip, bar shyǵynyn óz mindetine aldy. Qazir І jáne ІІ topqa kiretin 65 medıtsına qyzmetkeri jumystan keıin tynyǵady. Qatynas úshin arnaıy avtokólik bólindi», - dedi Áset Qalıev.
