Aqtóbede 88 myńnan astam adam revaktsınatsııadan ótti

AQTÓBE. QazAqparat – Aqtóbede vaktsına saldyrýy tıis adamdardyń 71% ımmýndaý sharasyna qatysty. Al 88 myńnan astam adam revaktsınatsııadan ótti, dep habarlaıdy QazAqparat tilshisi.

Ótken táýlikte Aqtóbede 9 adamnan koronavırýs ınfektsııasy anyqtaldy. Onyń beseýinde sımptom bar.

Oblystyq sanıtarııalyq-epıdemıologııalyq baqylaý departamenti basshysynyń orynbasary Muhtar Serbaevtyń aıtýynsha, qazir naýqastarmen baılanysta bolǵan 33 adam oqshaýlandy.

«Bıyl 30-39 jas aralyǵyndaǵy adamdardan koronavırýs ınfektsııasy jıi anyqtalyp jatyr. Sodan keıin 40-49 jas aralyǵyndaǵy adamdar da aýyryp, em izdep júr», - dedi Muhtar Serbaev.

Qazirgi kezde Aqtóbedegi ınfektsııalyq statsıonarlarda 139 adam em qabyldap jatyr.

Onyń 17-i jansaqtaý bóliminde bolsa, ekeýi ókpeni jasandy jeldetý apparatyna qosylǵan. Sonymen birge 18 bala ambýlatorııalyq baqylaýda.

Al 4 júkti kelinshek em qabyldap, aýrýhanada jatyr.

«Oblys boıynsha vaktsına saldyrýy tıis adamdardyń 71% ımmýndaý sharasyna qatysty. Al 88 myńnan astam adam revaktsınatsııadan ótti. Qazirgi kezde 14 myńnan astam adam Pfizer vaktsınasyn saldyrdy», - dedi oblystyq densaýlyq saqtaý basqarmasy basshysynyń orynbasary Bekbolat Іzbasarov.