Aqtóbede 8 jastaǵy bala sýǵa batyp ketti
AQTÓBE. QazAqparat - Aqtóbedegi Sazdy ózenine taǵy bir bala batyp ketti. Buǵan deıin qalanyń ortasyndaǵy osy ózenge shomylǵan úsh oqýshy sýǵa aǵyp ketken edi, dep habarlaıdy QazAqparat tilshisi.
Aqtóbe qalasynyń ortasymen aǵyp jatqan Sazdy ózenine 8 jastaǵy bala túsip, ajal qushty. Ata-ananyń baqylaýynsyz qalǵan mektep oqýshysynyń denesin qutqarýshylar 2 metr tereńdikten alyp shyqqan.
«2009 jylǵy bala sol mańda turady eken. Qala ishindegi saıajaı turǵyny tús mezgilinde sýǵa túsken. Janynda ata-anasy bolmaǵan. Biz qala turǵyndaryna jazǵy demalysta balalardy qadaǵalaýsyz qaldyrmaýdy surap, eskertý berdik. Biraq nátıje az. Balalar belgilenbegen jerge sýǵa túsip, arty qaıǵyly jaǵdaıǵa dýshar etip jatyr»,- dedi Aqtóbe oblystyq TJD jedel-qutqarý jasaǵy kezekshilik-dıspetcherlik bóliminiń basshysy Oksana Kıchıgına.
Eske salsaq, Balalardy qorǵaý kúni Aqtóbedegi Sazdy ózenine úsh oqýshy túsip, mert bolǵan bolatyn. https://kaz.inform.kz/news/aktobede-ush-bala-ozenge-batyp-ketti_a3032116 Jaz mezgilinde ózen arnasy tartylyp qalmaýy úshin arnaıy sý quıylyp, toltyrylady. Qala ishindegi bul jerge shomylýǵa tyıym salynǵanymen, erejeni saqtaý tártibin eshkim qadaǵalap jatqan joq. Jyl basynan beri óńirde 9 adam sýǵa ketip, qaza boldy. Onyń jeteýi bala.
