Aqtóbede 8 jasar balany kólik qaǵyp mert qyldy

AQTÓBE. QazAqparat - Aqtóbeniń Jańaqonys turǵyn alabynda qaıǵyly oqıǵa tirkeldi. 8 jasar balany kólik qaǵyp ketip, oqýshy aýrýhanada kóz jumdy, dep habarlaıdy QazAqparat tilshisi.

Oqıǵa 22 mamyr kúni keshkilik tirkeldi.

Qaladaǵy Jańaqonys turǵyn alabynda «Honda» avtokóliginiń júrgizýshisi jaıaý júrginshiler ótkelinde 8 jasar balany qaǵyp ketti.

«Apat saldarynan kámeletke tolmaǵan bala aýrýhanada qaıtys boldy. Jol-kólik oqıǵasy boıynsha sotqa deıingi tergeý bastaldy. Polıtsııa departamenti júrgizýshilerdi joldarda muqııat bolýǵa jáne jol erejesin qatan saqtaýǵa shaqyrady»,- dep habarlady Aqtóbe oblysy PD JPQB bastyǵynyń mindetin atqarýshy Aıdos Quljanov.

Aıta keteıik, ótken senbi kúni Aqtóbeniń Baıǵanın aýdanynda eki kólik soqtyǵysyp, 5 oqýshyny dárigerler qarap shyqqan edi.

Bir oqýshy qyzdyń buǵanasy synyp, travmatologtar gıps saldy.

Balalar 2009, 2010, 2011 jáne 2012 jyly týǵan. Al kólik ishinde bolǵan jattyqtyrýshy 27 jasta. Bári aman.

Al oblystyq bilim basqarmasynyń basshysy Jaıyq Sultan tergeý júrip jatqanyn habarlady.

«Aýdandyq polıtsııa bólimi anyqtap, tergeý jumystaryn júrgizip jatyr.​ Tolyq aqparatyn sonan soń beremiz»,- dedi. Sonymen birge ata-analarǵa túsindirý jumysy júrgizilgen.

Vıdeo: Aqtóbe oblystyq PD baspasóz qyzmeti.

Aıdos Quljanov Aqtóbe oblysy PD JPQB bastyǵynyń mindetin atqarýshy