Aqtóbede 8 jasar bala oıyn alańynda jaraqattanyp qaldy
AQTÓBE. QazAqparat - Aqtóbedegi oıyn-saýyq kesheninde 8 jasar bala jaraqat aldy. Oqýshynyń ata-anasy demalys ornynyń ıesin jaýapkershilikke tartyp, qylmystyq istiń qozǵalýyn talap etti, dep habarlaıdy QazAqparat tilshisi.
Tosyn oqıǵa 26 tamyz kúni boldy.
«Bala «Gravıtatsııa» bólmesinde jaraqat aldy. Onda kez kelgen zat keri baǵytqa qaraı qozǵalyp turady. Bul balanyń ǵana emes, eresekterdiń de basyn aınaldyrady. Dál osy bólmede temir oryndyq edenge bekitilgen. Bala qulap, oryndyqtyń ushyna basyn soǵyp aldy. Basyna zaqym kelip, tigýge týra keldi. Jaǵdaı budan da qıyn bolar edi»,- dedi otbasynyń qorǵaýshysy Stanıslav Nıkıforov.
Oqıǵa bolǵan kezde balanyń ata-anasy bólme syrtynda júrgen. Sebebi, oıyn bólmesi tek balalarǵa arnalǵan. Basy jaralanyp, qanaǵan kezde balanyń ákesi ony aýrýhanaǵa apardy. Jara tereń bolǵan soń tigýge týra kelgen. Otbasy demalys ornyn jaýapkershilikke tartyp, jazalanǵanyn qalaıdy. Olar Qylmystyq kodekstiń «Qaýipsizdik talaptaryn saqtamaı qyzmet kórsetý» baby boıynsha is qozǵaý úshin aryz jazdy.
«Polıtsııaǵa aryz jazyldy. Biraq nátıje joq. Keıin oblystyq prokýratýra men ІІM-ge aryz berildi»,- dedi qorǵaýshy.
QazAqparat oblystyq ІІD-nen aqparat kútedi.
