Aqtóbede 8 aýyldyń ákimi saılandy
AQTÓBE. KAZINFORM — Saılaý oblystyń 5 aýdanynda ótti. Ákim bolǵandar arasynda burynǵy mektep dırektorymen qatar óz qyzmetin saqtap qalǵandar da bar.
Muǵaljar aýdandyq aýmaqtyq saılaý komıssııasynyń habarlaýynsha, Eńbek aýyldyq okrýgi ákiminiń saılaýynda 962 turǵyn óz tańdaýyn jasady. 42 jastaǵy Qaırat Sársenbaev 720 daýys jınap, saılandy. Ol buǵan deıin Saǵashıli jalpy bilim beretin orta mektebiniń dırektory qyzmetin atqarǵan jáne ózin-ózi usynǵan. Al osy aýdandaǵy Juryn aýyldyq okrýgi ákiminiń saılaýynda 677 azamat daýys berdi. Ózin-ózi usynǵan Asylbek Qońratbaev 499 daýys jınap, saılandy. Ol «Damu-Master» JShS dırektorynyń orynbasary qyzmetin atqardy.
Áıteke bı aýdandyq aýmaqtyq saılaý komıssııasynyń habarlaýynsha, Aqtasty aýyldyq okrýginiń ákimi qyzmetine Serikǵalı Tampıshev saılandy. Áıteke bı aýdany Temirbek Júrgenov aýylynyń turǵyny «Ádilet» partııasy atynan usynylyp, 191 daýys jınady. Jabasaq aýyldyq okrýgi ákiminiń qyzmetin Serikqalı Ermaǵambetov atqarady. Ol buǵan deıin Baıjankól bastaýysh mektebiniń dırektory boldy jáne kardıdatýrasyn «Ádilet» partııasy usyndy.
Hromtaý aýdandyq aýmaqtyq saılaý komıssııasynyń qorytyndysyna súıensek, Kóktaý aýyldyq okrýginiń ákimi qyzmetin endi Ǵalymjan Ernazarov atqarady. Ol buǵan deıin Kóktóbe aýyldyq okrýgi ákiminiń apparatynda bas mamany boldy. Ózin-ózi usynyp, eń kóp daýys jınady. Tassaı aýyldyq okrýginiń ákimin saılaýǵa 228 turǵyn qatysty. Abaı aýyldyq okrýgi ákimi apparatynyń bas mamany bolǵan Ernur Kemeluly eń kóp daýys jınap, saılandy. Onyń kandıdatýrasy «Respublica» partııasy atynan usynylǵan.
Qarǵaly aýdandyq aýmaqtyq saılaý komıssııasynyń habarlaýynsha, Aşylysaı aýyldyq okrýgi ákiminiń saılaýy kezinde 667 turǵyn daýys berdi. Saılaýǵa úsh kandıdat usynyldy, onyń ishinde Asylbek Bımanbaev 486 daýys jınady. Qarǵaly aýdany ákimdiginiń portalyndaǵy aqparatqa súıensek, ol 2014 jyldyń qazan aıynan bastap kúni búginge deıin Aşylysaı aýyldyq okrýginiń ákimi qyzmetin atqardy. Bul joly «Ádilet» partııasy atynan usynylǵan.
Shalqar aýdany Aıshýaq aýyldyq okrýginde 906 saılaýshy tirkelse, sonyń tek 440-y daýys berdi. Bıýlletenniń 23-i jaramsyz dep tanylǵan, 4 saılaýshy «bárine qarsymyn» degen joldy tańdady. Nátıjesinde 25 jastaǵy Beket Qudaıbergenov 345 daýys jınap, Aıshýaq aýyldyq okrýginiń ákimi bolyp saılandy. «Aıshýaq — Nesibe» aýyl sharýashylyǵy óndiristik kooperatıviniń tóraǵasy qyzmetin atqarǵan ol saılaýda ózin-ózi usynǵan.
Eske salsaq, bes aýdandaǵy saılaý keshe ótti. Buǵan deıin maýsym aıynda tórt aýyldyń ákimi saılandy.
