Aqtóbede 8 adamnyń ólimine ákep soqqan jol apatyna úkim shyqty

AQTÓBE. QazAqparat – Aqtóbe-Atyraý tasjolynda jol-kólik oqıǵasy bolyp, bir mezette úsh kólik soqtyǵysty. Júrgizýshi negizgi trassaǵa shyqqan kezde erejeni saqtamaǵan. Búgin sotta kináli dep tanylyp, bas bostandyǵynan aıyryldy, dep habarlaıdy QazAqparat tilshisi.

Oqıǵa bıyl aqpan aıynda Aqtóbe-Atyraý tasjolynda boldy.

Іs materıalyna súıensek, «VAZ-21140» markaly avtokóligin basqarǵan 55 jastaǵy júrgizýshi tasjolǵa shyǵar kezde negizgi baǵytta kele jatqan «LADA Largus» kóligimen soqtyǵysty.

Qatty soqqy kezinde «LADA Largus» kóligi qarama-qarsy baǵytqa shyǵyp ketip, «Kia Sorento» avtokóligimen soqtyǵysty.

Oqıǵa ornynda 5 adam qaza taýyp, aýdandyq aýrýhanada 3 adam kóz jumǵan.

Osy oqıǵadan soń Qylmystyq kodekstiń «Abaısyzda eki nemese odan da kóp adamnyń ólimine ákep soqqan jol júrisi qaǵıdalaryn buzý» baby boıynsha is qozǵaldy.

Búgin sotta úkim shyqty.

«Sot otyrysynda sottalýshy taǵylǵan aıypty tolyq moıyndady. Prokýror taǵylǵan aıypty qoldap, sottan sottalýshyny 7 jylǵa kólik basqarý quqyǵynan aıyra otyryp, 5 jyl merzimge bas bostandyǵynan aıyrýdy surady. Sot sottalýshynyń shyn júrekten ókingenin jáne keltirilgen materıaldyq, moraldyq shyǵyndardy ótegenin jazany jeńildetetin mán-jaı retinde negizge aldy. Sonymen qatar sottalýshynyń densaýlyq jaǵdaıy nazarǵa alyndy. Qazir ol onkologııalyq dertke shaldyqqan jáne ІІІ toptaǵy múgedek. Jazany aýyrlatatyn mán-jáı joq. Sottyń úkimimen K. kináli dep tanylyp, oǵan 7 jylǵa kólik basqarý quqyǵynan aıyra otyryp, 5 jyl merzimge bas bostandyǵynan aıyrý jazasy taǵaıyndaldy. Jaza óteý orny qylmystyq-atqarý júıesiniń qaýipsizdigi barynsha tómen mekemesi dep belgilengen. Úkim zańdy kúshine engen joq», - dep habarlady Muǵaljar aýdandyq sotynyń baspasóz qyzmeti.