Aqtóbede 76 keli esirtki tárkilendi

ASTANA. KAZINFORM – Aqtóbede oblysynda eki jasyryn esirtki zerthanasy anyqtalyp, 76 keliden astam sıntetıkalyq esirtki tárkilendi. Bul týraly Aqtóbe oblysynyń prokýratýrasynyń baspasóz qyzmeti habarlady. 

Osy jyly Aqtóbe qalasynyń prokýratýrasy polıtsııa organdarymen birlesip «Nashaqorlyqqa jol joq!» atty profılaktıkalyq is-sharalar aıasynda qala aýmaǵynda 300-den astam esirtki jarnamasy men esirtki dúkenderiniń siltemeleri bar narkograffıtılerdi anyqtap, joıdy.

Budan bólek, kommýnaldyq qyzmettermen (JShS «ATK Qyzmet») narkograffıtı derekteri anyqtalǵan jaǵdaıda polıtsııa organdaryn ýaqtyly habardar etý jóninde memorandýmdar jasaldy.

— Sonymen qatar, 59,5 mln teńgege 2,5 myńnan astam «dropperlik» shottar men 1156 esirtki dúkenderiniń siltemeleri buǵattaldy, keń kólemdi túsindirý jumystary júrgizilip, 5000-nan astam broshıýra taratyldy, áleýmettik jelilerde 1000-nan astam jarııalanym ornalastyryldy, halyqpen 3000 kezdesý uıymdastyryldy (onyń ishinde mektep jáne joǵary oqý oryndary oqýshylary arasynda dárister ótkizilip, 20000-nan astam jas qamtyldy), 100-den astam aqparattyq bılbordtar ornatyldy, — delingen habarlamada.

Budan basqa, psıhıkalyq densaýlyq ortalyǵynyń qyzmetine taldaý júrgizildi.

— Zertteý barysynda esirtkige táýeldi dep esepteletin 205 adamnyń qaıtys bolǵany nemese basqa óńirlerge kóship ketkenine qaramastan, ortalyqtyń esebinen shyǵarylmaǵany anyqtaldy. Alaıda, atalǵan tulǵalardyń emine negizsiz túrde 2,5 mln teńge bıýdjet qarajaty bólinip, ortalyqtyń esepshotyna aýdarylǵan, — delingen prokýratýra habarlamasynda.

Prokýrorlyq qadaǵalaý aktisi boıynsha bıýdjet qarajaty keri qaıtarylyp, 6 laýazymdy tulǵa tártiptik jaýapkershilikke tartyldy.