Aqtóbede 745 myń sharshy metr turǵyn úı paıdalanýǵa berildi

ASTANA. KAZINFORM — Aqtóbe oblysynyń ákimi Ashat Shaharov óńirdegi sýmen, gazben jabdyqtaý jáne turǵyn úı salý jumystary týraly Ortalyq kommýnıkatsııalar qyzmetinde ótken baspasóz konferentsııasynda málimdedi.

Ákimniń aıtýynsha, aýyz sý máselesi óńirdiń áleýmettik damýy úshin negizgi basymdyqtardyń biri.

— Óńirdiń órkendeýinde halyqty sapaly aýyz sýmen qamtamasyz etý sheshýshi ról atqarady. Bıyl 1 300-den astam turǵyny bar 4 aýyl taza aýyz sýmen qamtyldy. Jyl sońyna deıin 2 myńǵa jýyq turǵyny bar 6 aýylda ortalyqtandyrylǵan aýyz sýmen jabdyqtaý jumystary tolyq aıaqtalady, — dedi ol.

Sonymen qatar ol brıfıng barysynda bıyl aýyldardy gazdandyrý qarqyny erekshe joǵary bolǵanyn aıtty.

— Bıyl oblys boıynsha aýyldardy tabıǵı gazǵa qosý qarqyny buryn-sońdy bolmaǵan kórsetkishke jetti. 9 myńǵa jýyq turǵyny bar 22 eldi meken gazǵa qosylǵan. Jyl aıaǵyna deıin taǵy 3 500 turǵyny bar 6 aýylǵa kógildir otyn keledi, — dep aıtty ol.

Sonymen birge Shaharov bıylǵy kórsetkish úshjyldyq jospardy da artyǵymen oryndaǵanyn atap ótti.

— Bar bolǵany bir jyldyń ishinde 28 aýyldy (12,3 myń adam) gazben qamtý arqyly biz 2022-2024 jyldarǵa arnalǵan úshjyldyq jospardy oryndaımyz. Nátıjesinde óńirde gazben qamtý deńgeıi 97%-ǵa jetedi, — dedi ol.

Ashat Shaharov turǵyn úı qurylysy da joǵary qarqynmen júrip jatqanyn jetkizdi.

— Bizdiń taǵy bir mańyzdy mindetimiz halyqty turǵyn úımen qamtamasyz etý. Jyl sońyna deıin Úkimet bekitken 1 mln sharshy metr turǵyn úıdi iske qosý josparyn tolyq oryndaımyz, — dedi ákim.

Ákimniń aıtýynsha, 10 aı ishinde óńirde 745 myń sharshy metr turǵyn úı paıdalanýǵa berilgen.

— Bıyl kezekte turǵan 419 otbasyny turǵyn úımen qamtamasyz ettik, jyl sońyna deıin taǵy 1 063 otbasy baspana alady, — dep qorytyndylady ol.

Aıta keteıik, qaıtarylǵan aktıvter esebinen Qostanaı oblysyndaǵy aýylǵa aýyz sý tartylyp jatyr.