Aqtóbede 722 myń gektar jerge egin egiledi
Aqtóbede aýyl sharýashylyǵy maqsatyndaǵy 722 myń gektar jerdiń 375 myń ga dándi, 85,2 myń ga maıly daqyl. Qalǵany mal azyǵy men kókónis, baqsha daqyly.
«Búginde 200 myń ga alqapta ylǵal jabý, 13 myń ga alqapta sebý aldyndaǵy óńdeý júrgizildi. Sonymen birge 3 myń ga alqapta kóktemgi jer jyrtý jumystary atqaryldy. Jazdyq dándi, maıly jáne mal azyǵy daqyldaryn egý jumystary bastaldy. Búgingi kúnge 6,5 myń ga túrli daqyl egildi. Onyń ishinde 3,2 myń ga dándi daqyldar, 1,7 myń ga maıly daqyldar, 1,5 myń ga mal azyǵy daqyly. Oblys kóleminde kóktemgi dalalyq jumystaryn júrgizýge1,5 myń traktor, 112 egis keshenin, 1,4 myń tuqym sepkish pen 1,4 myń jer óńdeıtin tehnıka jumyldyryldy. Kóktemgi dalalyq jumystarǵa aýyl sharýashylyǵy tehnıkalarynyń daıyndyǵy 97% quraıdy», - dedi oblystyq aýyl sharýashylyǵy basqarmasynyń basshysy Isataı Espaǵanbetov.
Aıta keteıik, oblys boıynsha kóktemgi egis jumystaryn júrgizý úshin 9,6 myń tonna arzandatylǵan dızel otyny bólindi. Sondaı-aq, qazirgi ýaqytta oblys boıynsha aýyl sharýashylyǵy taýar óndirýshileri mıneraldy tyńaıtqyshtar men gerbıtsıdterdi satyp alý jumystaryn júrgizip jatyr.
Oblys boıynsha 2,3 myń tonna tonna mıneraldy tyńaıtqysh jáne 264,2 myń lıtr gerbıtsıd satyp alýǵa kelisimsharttar jasaldy. Bıyl aýyl sharýashylyǵy qurylymdaryn qoldaý maqsatynda jergilikti bıýdjetten ósimdik sharýashylyǵyna1,3 mlrd teńge qarjy bólindi. «Agrarlyq nesıe korporatsııasy» AQ-y kóktemgi dalalyq jumystardy júrgizý úshin «Keń dala» jáne «Agrobıznes» baǵdarlamalary arqyly aýyl sharýashylyǵy qurylymdaryna 2,1 mlrd teńge nesıe berdi. Taǵy 1,1 mlrd teńgeniń joba ótinimderi qarastyrylyp jatyr.