Aqtóbede 72 myńnan astam adam tumaýǵa qarsy vaktsına aldy
AQTÓBE. QazAqparat – Aqtóbede tumaýǵa qarsy vaktsına berý jumysy jalǵasyp jatyr. Qazirgi 90 myńǵa jýyq dozanyń 80 paıyzy berildi, dep habarlaıdy QazAqparat tilshisi.
«Bıyl 37 myńǵa jýyq balaǵa tumaýǵa qarsy vaktsına beremiz. Qazirgi ýaqytta 25 myńnan astam bala egildi. Bul 60 paıyz kórsetkishti qurap otyr. Ekpe úshin jergilikti bıýdjetten 60 mıllıon teńge qarjy bólindi. Sonymen birge ár medıtsınalyq mekeme óz qarjysyna vaktsına alyp, turǵyndarǵa aqyly qyzmet kórsetip jatyr. Aqysyz túrde 6 aılyq balalar, júkti áıelder men balalar úıiniń tárbıelenýshileri, qarttar úıiniń turǵyndary men medıtsına qyzmetkerlerine beriledi», - dedi oblystyq densaýlyq saqtaý basqarmasynyń orynbasary Bekbolat Іzbasarov.
Aıta keteıik, 15-qazanǵa deıin turǵyndardyń 10 paıyzy ekpe alyp bolýy tıis.
«Vaktsına alǵan adam aýyrmaıdy dep aıta almaımyz. Biraq dertti jeńil ótkerýi múmkin. Ólim kórsetkishin de osy arqyly tómendete alamyz. Koronavırýsta, tumaýda adamnyń tynys alý joly zaqymdanady. Qazir biz úshin saqtyq sharasy mańyzdy. Qarapaıym erejeni ustanýymyz qajet. Salaýatty ómir saltyna den qoıyp, dárýmeni kóp taǵamdy tutynyńyz. Kópshilik jerde betperde kıińiz. Qoldy jıi jýý da mańyzdy», - dedi oblystyq bas ınfektsıonıst dárigeri Meırambek Qurmanǵazın.
