Aqtóbede 71 jastaǵy qarııadan koronavırýs anyqtaldy
AQTÓBE. QazAqparat – Sońǵy táýlikte Aqtóbede 3 adamnan koronavırýs ınfektsııasy anyqtaldy. Onyń bireýi jasy 70-ten asqan qarııa, dep habarlaıdy QazAqparat tilshisi.
Zertteý qorytyndysyna súıensek, 1973, 1949 jylǵy áıel adamdarǵa COVID-19 dıagnozy qoıylǵan. Bireýi – Aqtóbe qalasynan, ekinshisi – Mártók aýdanynan. Al bir adam JRVI sımptomdarynyń paıda bolýyna baılanysty medıtsınalyq kómekke júgingen. Tekserý kezinde odan da koronavırýs anyqtaldy. Naýqastarmen qarym-qatynasta bolǵan adamdar medıtsınalyq baqylaýǵa alyndy. Profılaktıkalyq jáne epıdemııaǵa qarsy sharalar jalǵasyp jatyr.
«Oblysta koronavırýs ınfektsııasymen aýyrǵan 3249 jaǵdaı tirkeldi. Onyń ishinde 48,9% aýrý belgilerimen. Barlyǵy 3180 adam, ıaǵnı, 97,9% jazylyp shyqty. Qazirgi tańda úı karantınine 41 adam alynyp, olarǵa medıtsınalyq baqylaý júrgizilýde», - dep habarlady oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti.
