Aqtóbede 70 myń elektr baǵanasy tozyp tur

AQTÓBE. KAZINFORM — Óńirdegi jaryq taratýshy kompanııa ázirge jylyna 2 myń baǵana aýystyrady. 

Aqtóbedegi birneshe aýylda elektr symyna muzdaq qatyp, jaryq ýaqytsha sóndirildi. Bul jumys birneshe kúnge sozyldy. Tek elektr symy emes, óńirde myńdaǵan baǵanany da aýystyrý kerek.

— Biz shamamen 70 myń elektr baǵanasyn aýystyrýymyz kerek. Bul kóp. «Energosıstema» JShS-i bolsa jyl saıyn 2 myń baǵanany aýystyrady. Dál osy qarqynmen bárin aýystyrýǵa kóp jyl ketedi. Sondyqtan aýdan, qalamen birge jumys atqarylady. Qazir aýdan, aýyldarda jaryq sónip jatyr. Bul tabıǵı qubylys. Qyraý qatyp qalyp jatyr, — dedi Aqtóbe oblysynyń ákimi Ashat Shaharov. 

Onyń aıtýynsha, elektr symy men baǵana aýystyrý jumystaryn taratýshy kompanııa, sonymen birge jańa ınvestorlar da atqarady.

Aıta keteıik, Aqtóbede elektr symyna muzdaq qatyp, birneshe aýyl jaryqsyz qaldy. 

Jyl basynda Muǵaljar aýdanyndaǵy elektr symynyń boıyna qatqan muzdaqtyń dıametri 20 sm boldy. Ol kezde eki aýylda ondaǵan baǵana qulady.