Aqtóbede 7 jastaǵy qyzdy soqqyǵa jyqqan erli-zaıypty munaradan sekirip ketti
AQTÓBE. QazAqparat - Aqtóbe qalasy, Qýraıly aýylynda 7 jastaǵy qyzdy soqqyǵa jyǵyp, polıtsııa aldynda jaýap bergen erli-zaıypty munaradan sekirip ketti. Ekeýi de oqıǵa ornynda qaza tapty. Qylmystyq is qozǵaldy, dep habarlaıdy QazAqparat tilshisi.
Aqtóbe qalasy, Qýraıly aýylynda 7 jastaǵy Krıstına Shýsterdi ógeı anasy soqqyǵa jyqqany týraly buǵan deıin habarlaǵan bolatynbyz . Qazir mektep oqýshysy aýrýhanada jatyr. Al keshkilik polıtsııaǵa belgisiz bireý habarlasyp, Qýraıly aýylyndaǵy munara basyna erli-zaıypty V.Shýster men Á.Dúısenovanyń shyqqanyn, olar óz-ózine qol jumsaıtyndary týraly aıtyp qorqytqanyn jetkizdi.
«Oqıǵa ornyna jergilikti atqarýshy organdar men quqyq qorǵaýshylar bardy. Munara basyna shyqqan erli-zaıyptylar arasynda kelissóz júrdi. Degenmen ekeýi de kelisimge kelmeı, bıikten sekirip ketti»,- dep habarlady oblystyq ishki ister departamentiniń baspasóz qyzmeti. Kelissóz eki saǵatqa sozylǵanymen, esh nátıje bermegen. Vladımır Shýster men Ásel Dúısenbaeva oqıǵa ornynda kóz jumdy.
Aıta keteıik, osy keleńsiz jaǵdaı boıynsha oblystyq ishki ister departamenti Qylmystyq kodekstiń «Ózin-ózi óltirýge deıin jetkizý» baby boıynsha is qozǵady. Birneshe saraptama taǵaıyndalyp, tergeý bastaldy.
