Aqtóbede 7 jastaǵy qyz ógeı sheshesiniń soqqysynan soń aýrýhanaǵa tústi
AQTÓBE. QazAqparat - Aqtóbe qalasy Qýraıly aýyldyq okrýginiń turǵyndary ýchaskelik polıtsııa qyzmetkerin shaqyryp, 7 jastaǵy qyzdy aman alyp qaldy. Qazir bas-mı jaraqatyn alǵan oqýshy aýrýhanada em qabyldap jatyr, dep habarlaıdy QazAqparat tilshisi.
Aqtóbe qalasy Qýraıly aýylyndaǵy 7 jastaǵy qyzdy kórshileri aman alyp qaldy. Krıstına Shýsterdi ógeı sheshesi uryp, tamaq bermeı, ash ustaǵan. Qyzdyń kóz janary qantalap, soqqy tıgen jerleri kógerip ketken. Birneshe kún buryn aıqaı-shý bolyp, keıin únsiz qalǵan otbasydan kúdiktengen aýyl turǵyndary dereý polıtsııa qyzmetkerinen kómek suraıdy.
«Krıstınanyń ákesi buryn balasyna jaqsy qarap, qamqor bolyp júrgen. Úılengen soń adam tanymastaı ózgerip ketti. Úı ıelerin kórgen kezde balalardy suraımyn. «Olar teledıdar qarap otyr» dep qysqa qaıyratyn. Bári qıyn jaǵdaımen aıaqtaldy», - deıdi aýyl turǵyny, kórshisi Qasııa Qosjanova.
Aıta keteıik, osy oqıǵa boıynsha Qylmystyq kodekstiń «Kámeletke tolmaǵan adamdy tárbıeleý jónindegi mindetterdi oryndamaý» baby boıynsha is qozǵalyp, tergeý bastaldy. Eger ata-ananyń kinási tolyq dáleldense 300 aılyq eseptik kórsetkishke deıingi mólsherde aıyppul tóleıdi nemese qoǵamdyq jumystarǵa tartylady. Tipti 75 táýlikke deıingi temir torǵa qamalýy múmkin. Al bas-mı jaraqatymen aýrýhanaǵa túsken Krıstına Shýster qazir aýrýhanada em alyp jatyr. Onyń boıyn úreı bılegen.
«Úıge qaıtyp barǵym kelmeıdi. Anama barsam deımin. Meni qutqaryp qalǵan Qazbek aǵaǵa rahmet aıtamyn», - dedi Krıstına Shýster.
Turǵyndar dabyl qaǵyp, ýchaskelik polıtsııa qyzmetkeri izdep baryp, 7 jastaǵy qyzdy úıinen tapty. Balanyń bet-aýzy qantalaǵan, kózi kógergen. Mektep oqýshysy sol mezette aýrýhanaǵa jatqyzyldy. Polıtsııa qyzmetkeri oqýshyny shkaf ishinen taýyp alǵan.
«Úıge barǵan kezde esikti eshkim ashpady. Keıin tapjylmaı turyp, úıge kirýge múmkindik aldyq. Olar qyzdy shkaf ishinde qamap otyrǵan eken. Oqýshy qyz qatty qorqyp qalǵan. Endi úıine barǵysy kelmeıdi», - dedi Zaýyt polıtsııa bóliminiń ýchaskelik polıtsııa qyzmetkeri Qazbek Adaıbaev.
Krıstına Shýster 1 jasqa tolǵanda anasy odan bas tartyp, sábıler úıine tapsyrǵan. Al úsh jasqa kelgen soń ony ákesi V.Shýster alyp, tárbıeleıdi. Alǵashqy jyldary qyzy men ákesi arasyndaǵy qarym-qatynas óte jaqsy bolǵan. Keıin V.Shýster úılenip, Krıstına ógeı sheshesimen til tabysa almaǵan. Іs boıynsha tergeý júrip jatyr. K.Shýster aýrýhanadan shyqqan soń kámelet jasqa tolmaǵandardy ýaqytsha beıimdeý ortalyǵyna jatqyzylady.
