Aqtóbede 7 jastaǵy balaǵa zorlyq kórsetý deregine qatysty komıssııa otyrysy ótti

Aqtóbede kámeletke tolmaǵandardyń isteri jáne quqyqtaryn qorǵaý jónindegi oblystyq komıssııanyń kezekten tys otyrysy ótip. Oǵan QR Bilim jáne ǵylym mınıstrliginiń Balalardyń quqyqtaryn qorǵaý komıtetiniń tóraǵasy E.Imanǵalıev, qosymsha bilim beretin respýblıkalyq oqý-ádistemelik ortalyqtyń dırektory R.Sher, oblys ákiminiń orynbasary Búlbul Eleýsinova, oblystyq bilim basqarmasynyń basshysy Joldas Batyrhan, jergilikti polıtsııa qyzmetiniń basqarma bastyǵy Ardana Saımaǵanbetov, oblystyq bilim salasynda sapany qamtamasyz etý departamenti basshysynyń orynbasary

J. Muhambetalına, kámeletke tolmaǵandardyń isteri jáne olardyń quqyqtaryn qorǵaý jónindegi oblystyq komıssııanyń hatshysy Joldas Nurshın, mektep ákimshiligi qatysty.
Otyrysta Aqtóbe qalasyndaǵy orta mekteptiń 1 synyp oqýshysyna qatysty zorlyq-zombylyq týraly quzyrly organdarǵa habarlamaǵany úshin jaýapqa tartý suraqtary, sonymen qatar, balalardy qorǵaý sharalarynyń keshenin jasaı otyra kámeletke tolmaǵandarǵa qatysty quqyqbuzýshylyq pen zorlyq-zombylyqtyń aldyn alý suraqtary qaraldy. Komıssııa músheleri zardap shekken bala men onyń otbasyna psıhologııalyq qoldaý men kómekti uıymdastyrý kerektigin atap ótti. Mektep ákimshiligin qylmystyq isti tergeýi aıaqtalǵanǵa deıin jumystan ýaqytsha shekteý usynyldy. Budan ózge, bilim berý mekemeleriniń qyzmetkerlerine kámeletke tolmaǵandarǵa qatysty quqyqbuzýshylyq derekterin anyqtaý jáne olarǵa den qoıý suraqtary boıynsha oqý semınaryn ótkizý usynyldy.
Eske salsaq, Aqtóbe polıtsııasy mektep oqýshysyna nápsiqumarlyq sıpattaǵy kúsh qoldaný deregine qatysty tergeýdi bastap, birneshe saraptama taǵaıyndady. Oblystyq bilim basqarmasynyń basshysy Joldas Batyrhannyń aıtýynsha, alǵashqy saraptamanyń qorytyndysy boıynsha zorlyq faktisi anyqtalmaǵan.