Aqtóbede 7 jastaǵy bala besinshi qabattan qulap ketti
AQTÓBE. QazAqparat – Aqtóbe qalasynda 7 jastaǵy bala besinshi qabattaǵy terezeden qulap ketti. Qazir ol oblystyq balalar aýrýhanasynyń jansaqtaý bóliminde jatyr, dep habarlaıdy QazAqparat tilshisi.
3 maýsym kúni Aqtóbe qalasy Batys-2 shaǵyn aýdanynda oqys jaǵdaı tirkeldi. 7 jastaǵy bala besinshi qabattan qulap ketken.
«Bala túrli dene jaraqatymen oblystyq balalar aýrýhanasyna tústi. Ol úıinde jalǵyz bolǵan. Uıyqtap jatqan balany anasy birneshe mınýtqa qaldyryp, dúkenge baryp kelgen. Kóbine eresekter balalaryn nazardan tys qaldyryp, jazataıym oqıǵaǵa dýshar bolady. Sondyqtan terezeni myqty bekitip, arnaıy tor ornatýdy usynamyn. Keıbir jıhazdy tereze janyna qoıýmaý kerek. Balalar terezege ońaı shyǵyp ketip, shybyn-shirkeıden qorǵaıtyn torkózge súıengende qulaıdy. Munyń bárin ata-ana eskerýi tıis», - dedi oblystyq PD bastyǵy Atyǵaı Arystanov.
Qazir bala oblystyq aýrýhananyń jansaqtaý bóliminde jatyr. Dárigerler jaǵdaıyn turaqty aýyr dep otyr.
«Bala túrli dene jaraqatymen tústi. Onyń birneshe omyrtqasy synǵan. Jabyq bas-mı jaraqatyn alǵan. Travmatıkalyq shok ta bar. Іshki qurylystary da zaqymdandy. Jansaqtaý bólimindegi balanyń jaǵdaıy turaqty aýyr», - dedi oblystyq balalar aýrýhanasynyń bas dárigeri Erbol Japaqov.
