Aqtóbede 7 jasar bala ashyq turǵan qudyqqa túsip ketti
AQTÓBE. KAZINFORM – Balanyń jylap, kómekke shaqyrǵan daýysyn janynan ótip bara jatqan jas jigit estip, kórshilerin kómekke shaqyrǵan. Sóıtip eresekter oqýshyny 3 metr tereńdikten alyp shyqty.
Aqtóbe qalasy Almaty aýdany Qarǵaly turǵan alabynda mektep oqýshysy qudyqqa túsip ketti. Qudyq buǵan deıin kólik dóńgelegimen belgilenip qoıǵan. Qatty jel kezinde artqa qaraı júrgen oqýshy baıqaýsyzda shalynyp, qudyqqa qulaǵan.
– Meniń balam ájesiniń úıinen kele jatqan edi. Sol kezde joldan balanyń jylaǵan daýysyn estigen. Alǵashqyda daýys aýla ishinen, tipti daladaǵy dárethanadan shyǵyp jatyr dep oılady. Ol janynda turǵan qudyqqa úńilip qaraǵanda balany kóredi. Qudyqtyń betinde kólik dóńgelegi bolǵan. Qatty jel kezinde bala artqa qaraı júrip, sonda túsip ketedi. Balany kórgen boıda maǵan habarlasyp, tótenshe jaǵdaılar qyzmetin shaqyrýdy surady. Men olar kelgenshe kóp ýaqyt ótetinin, kórshilerdi shaqyrýyn suradym. Sóıtip kórshilerdi, aǵasyn shaqyryp, sol jerden ótip bara jatqan jasóspirimnen kómektesýin suraıdy. Aryqsha kelgen balany qudyqqa túsirip, oqýshyny mataǵa ilip, alyp shyqqan. Keıin kómek kórsetken bala shyǵaryldy. Biz ol balany tanımyz, bilemiz. Ol 7 jastaǵy bala. Tereńdigi úsh metr qudyq buǵan deıin ashyq turǵan, - dedi qala turǵyny Orynsha Bısenbekova.
Onyń aıtýynsha, oqýshy qudyq ishinde jarty saǵat otyryp, kómek kútken. Ata-ájesiniń, ata-anasynyń atyn aıtyp shaqyryp, jylaǵan.
«Aqtobe su energy group» AQ habarlaýynsha, bul qudyq «Álıhan Oıl» JShS-ne tıesili.
– Turǵyndardan qaýip týraly aqparat túsken soń «Aqtobe su energy group» AQ qyzmetkerleri jedel túrde oqıǵa ornyna baryp, qudyq betin japty. Qala turǵyndarynyń qaýipsizdigi biz úshin árqaıym basty orynda. Sondyqtan mundaı jaǵdaıda jedel áreket etýge tyrysamyz, - dep habarlady kommýnaldyq kompanııa.
Oqýshynyń anasy Aıgerim Rýsanova búgin polıtsııaǵa aryz túsirdi. Qudyq ıesin anyqtap, shara qoldanýdy surap otyr. Erteń prokýratýra men sotqa da shaǵym túsirmek.
– Balam qazir aýrýhanada jatyr. Onyń dene temperatýrasy túsip ketip, em qabyldaý qajet boldy. Sonymen birge jabyq bas-mı jaraqatyn alǵan bolýy múmkin. Ol jaǵy áli naqtylanady. Tobyǵy da taıyp ketken sekildi. Ol qatty qorqyp qalǵan. Balam ekinshi synyp oqýshysy bolǵanymen densaýlyǵyna baılanysty eki apta mektepke barmady. Biraq qosymshasynan qalmady. Sol kezde de repetıtordan shyǵyp, úıge kele jatqan shaǵy edi. Bul jerde adamdar júredi. Kórshilerimniń aıtýynsha, qudyq eki jyldaı sol kúıi turǵan. Al oqıǵa bolǵanda birden kelip, jarty saǵatta japty, - dedi oqýshynyń anasy Aıgerim Rýsanova.
Onyń aıtýynsha, qudyqtan shyqqan bala alǵashynda kıimderin qaǵyp, jasóspirimdermen úıine kelgen. Et qyzýymen eshteńe sezbegenimen anasy qarap, denesi mundaı ekenin biledi. Keıin aýrýhanaǵa jetkizip, dárigerler qaraýyna qaldyrýdy jón kórdi.
Buǵan deıin habarlaǵanymyzdaı, Abaı oblysynda iz-túzsiz joǵalǵan bala 6 saǵat boıy qudyqta bolǵan.