Aqtóbede 7 qabatty úıdiń terezesinen qulaǵan 5 jasar bala kóz jumdy

AQTÓBE. KAZINFORM – Aqtóbe qalasyndaǵy turǵyn úılerdiń birinde qaıǵyly jaǵdaı boldy. Bólmede oınap júrgen 5 jasar bala terezeden qulap ketti. 

Aqtóbe oblystyq polıtsııa departamenti jaz mezgilinde tereze jıi ashyq turatynyn aıtyp, turǵyndarǵa jıi eskertý jasap keledi. Degenmen balalardyń terezeden qulap ketý deregi jıilep ketti. 

– Bala bólmede oınap júrip, tereze aldyna shyqqan. Olar kópqabatty úıdiń 7-qabatynda turady. 5 jasar bala abaısyzda qulap, alǵan dene jaraqatynan oqıǵa ornynda qaıtys boldy. Bıyl oblysta 7 bala terezeden qulady. Bireýi qaıǵyly aıaqtalyp tur, - dedi oblystyq PD baspasóz qyzmetiniń jetekshisi Erbolat Sarqulov. 

Eske salsaq, 6 jáne 7 mamyr kúnderi eki bala besinshi qabattan qulap ketti. Olardyń biri – 2-de, al, ekinshisi – 5 jasta. Ekeýi de birden oblystyq balalar aýrýhanasynyń jansaqtaý bólimine jetkizildi. Bes jasar balanyń oblys ortalyǵyna Shalqar aýdanynan kelgeni anyqtaldy.