Aqtóbede 7 búrkit aýlap, satpaq bolǵan kúdikti ustaldy
AQTÓBE. QazAqparat - Aqtóbede Qyzyl kitapqa engen búrkitti aýlaǵan kúdikti ustaldy, dep habarlaıdy QazAqparat tilshisi.
Aqtóbe oblystyq polıtsııa departamentiniń patrýl polıtsııasy rotasy Qarabutaq-Qostanaı tas jolynda jeńil kólikti toqtatty. Polıtsııa qyzmetkerleri Mártók aýdanynyń turǵynynan 7 búrkit tárkiledi. Qyzyl kitapqa engen qusty ol Nur-Sultan qalasyna aparyp satý úshin aýlap alǵan.
Oblystyq polıtsııa departamenti baspasóz qyzmetiniń habarlaýynsha, Qylmystyq kodekstiń «Ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý» baby boıynsha is qozǵalyp, tergeý júrip jatyr.
Baspasóz jetekshisi Erbolat Sarqulovtyń aıtýynsha, tárkilengen búrkitter Jas natýralıster stansasynda tur. Tergeý jumystary aıaqtalǵan soń búrkit meken etken Mártók aýdanyna qaıta jiberilýi múmkin.
