Aqtóbede №7 baǵdardaǵy avtobýs júrgizýshileri jumysqa shyqpaı qaldy
AQTÓBE. QazAqparat - Búgin Aqtóbe qalasyndaǵy №7 baǵbardaǵy jolaýshylar tasymaldaıtyn avtobýstyń júrgizýshileri jumysqa shyqpaı qaldy. Olar kún saıyn tóleıtin jospardyń bir aıda eki ret qymbattaǵanyna narazy, dep habarlaıdy «QazAqparat» tilshisi.
Aqtóbedegi jolaýshylar tasymalynyń basym bóligin óz mindetine alǵan «Avtopark» JShS-niń júrgizýshileri búgin basshylaryna narazylyqtaryn bildirdi. Olar naýryz aıynyń ortasynda kúnine 24 myń teńge tapsyrsa, eki aptadan soń jospar quny 25 teńge bolǵan. 2016 jyldyń qyrkúıeginen beri aı saıyn qymbattaǵan qoǵamdyq kólik jospary búgin kóp adamdy jumyssyz qaldyrdy. Basshylar olarǵa oılanyp, sheshim shyǵarýǵa 2 kún berdi.
«Jospar qymbattap jatyr. Aıyna 1-2 myń teńge qosyp otyr. Biz 23 myń teńgelik jospardy da oryndaı almadyq. Al olar eshteńege qaramastan taǵy kóterdi. Bul bizdiń qolymyzdaǵy jaǵdaı emes. Adamdar qalaı minedi, solaı tapsyramyz. Senbi kúni 18 myń teńge tólep edik, ony 22 myń teńgege, jeksenbiniń aqshasyn 15 myńnan 18 myńǵa kóterdi. Suraǵanymyzda, 40 myń 45 myń teńge tapqan adamdy mysalǵa keltirdi. Ony eseptedik, esebine jete almadyq. Biz kondýktorǵa beremiz, ózimizdi jáne ony tamaqtandyramyz, janar-jaǵarmaıdy alamyz»,- dedi Nurken Jaıbekov. Onyń aıtýynsha, júrgizýshiler jumys isteýge qarsy emes, tek jospardyń únemi ózgerip turǵanyna narazy.
Aqtóbedegi qoǵamdyq kólik júrgizýshileri aıyna 40-50 myń teńge jalaqy alyp otyr. Otbasyn asyrap otyrǵan júrgizýshiler páter jaldap turatyndaryn, nesıeleri bar ekenin alǵa tartty. Al olardyń jumystaǵy ár qadamy aqyly. Máselen, júrgizýshiler kún saıyn jumysqa shyqqan kezde ishimdik ishpegenin dáleldep, medıtsınalyq tekserýge 50 teńge ustatyp ketedi. Jospardy oryndap, aqsha tapsyrǵan kezde kassırge 100 teńge beredi. Sonymen qatar, avtoturaqqa kólik qoıý aqyly.
«Jospar kótermes buryn bizde tekserý jumystary júrgizildi. Ár marshrýtqa baqylaýshy otyryp, №7 baǵyttaǵy avtobýsqa minetin jolaýshylardyń sany esepteldi. Sóıtip, 14 naýryz kúni jospar qymbattady. Qazir 25 myń teńge etip kóterip otyrmyz. 28-29 qańtar kúnderi ár júrgizýshi 4-6 myń teńgege jospardy toltyrmaǵanyn bildik. Olar ózara kelisip alǵan degen sheshimge keldik. Biz júrgizýshilerdi jumystan shyǵarmaımyz, biraq jospardy oryndaýyn qadaǵalaımyz»,- deıdi «Avtopark» JShS-niń dırektory Aıbek Sársenǵalıev.
Búgin №7 baǵytta júretin 13 marshrýt túgel shyqpaı qaldy. Olardyń ornyna ózge baǵytta qatynaıtyn 8 avtobýs jiberilgen.
