Aqtóbede 600 sharýa qojalyǵy tólge beriletin sýbsıdııasyn ala almaı otyr

AQTÓBE. QazAqparat - Aqtóbe oblysynda 600-ge jýyq sharýa qojalyǵy buryn memleketten alatyn, maldyń tóline bólinetin sýbsıdııany ala almaı otyr. Túıtkildi másele kásipkerlerdi qorǵaý jónindegi keńes otyrysynda qaraldy, dep habarlaıdy QazAqparat tilshisi.

«Kóktemde fermerler tóldiń sýbsıdııasyn alýǵa ótinish tapsyrǵan. Biraq mal sharýashylyǵyn damytýdy sýbsıdııalaý baǵdarlamasynda osy baǵyttaǵy bıýdjet qarajattary bolmaǵandyqtan, fermerlerge sýbsıdııa berilgen joq. Fermerler aýdandyq aýyl sharýashylyǵy bólimderinde sýbsıdııalaý boıynsha ótinishteriniń qabyldanbaǵanyn aıtyp shaǵym túsirgen», - deıdi kásipkerler palatasynyń bólim bastyǵy Nurlan Mahambetov.

Oblystyq aýyl sharýashylyǵy basqarmasyndaǵylar Aýyl sharýashylyǵy mınıstrliginiń mal sharýashylyǵyn sýbsıdııalandyrý boıynsha jańa erejelerdiń shyǵýyn jarty jyl kútken. Ol úshin oblys ákimdiginiń qaýlysyna ózgerister engizilgen. Biraq qazir oblystyq basqarma jańa erejelerdi kútpeı-aq, burynǵy erejelerdi qaıtaryp, tóldeýge qatysty sýbsıdııany bekitýge sheshim qabyldady.

«Qazir biz iri qaranyń tóldeýi boıynsha sýbsıdııalarǵa ótinish qabyldap jatyrmyz. Ákimdiktiń qaýlysyna ózgeris engizdik, 15-20 kún ishinde qabyldanǵan ótinishterdiń barlyǵyna sýbsıdııa bere bastaımyz. Biraq osy ýaqyt aralyǵynda jańa erejeler shyqsa, biz buny toqtatamyz», - deıdi aýyl sharýashylyǵy basqarmasynyń mal sharýashylyǵy bóliminiń basshysy Panabek Bımuratov.

Onyń aıtýynsha, aýdandarda «sýbsıdııa ótinishterin qabyldamaı jatyr» degen aqparat shyndyqqa janaspaıdy.