Aqtóbede 600 oryndyq mektep paıdalanýǵa berildi
Astana kúni qarsańynda Dóń aýylynyń balalaryna jańa mektep esigin aıqara ashty. 600 oryndyq mektepti salyp, zamanaýı tehnıkamen jabdyqtaýǵa 1,4 mıllıard teńge jumsalǵan.
«Kez kelgen ult pen memlekettiń bolashaǵy eń aldymen, azamattardyń bilimdiligine, mádenı deńgeıi men densaýlyǵyna baılanysty. Táýelsizdik alǵan kúnnen bastap Prezıdentimiz Nursultan Nazarbaev Qazaqstan óziniń aqyldy ári saýatty azamattarynyń arqasynda damyǵan otyz eldiń qataryna enýi úshin barlyǵyn jasap jatyr. Prezıdent tapsyrmasyn oryndaı otyra, biz ótken jyly Aqtóbe oblysynda 14 jańa mektepti ashtyq. Qazir 26 mektep salyp jatyrmyz, solardyń 13-in jyl sońyna deıin paıdalanýǵa beremiz. Dóń aýylyndaǵy mektep Astananyń mereıtoıyna, sonymen qatar Dóń taý-ken baıytý kombınatynyń 80 jyldyǵyna oraı ashylyp otyr. Bul aýyldyń ekonomıkalyq jaǵynan belsendi halqynyń 60 paıyzy - osy kombınattyń qyzmetkerleri», - dedi oblys ákimi Berdibek Saparbaev.
Jańa mektep 3 qabatty. Aqtóbe oblysy ákimi baspasóz qyzmetiniń habarlaýynsha, munda kitaphana, eki sport jáne májilis zaly, ashana, hımııa, bıologııa, fızıka men zamanaýı lıngafon kabıneti bar. Munda balalardyń shyǵarmashylyqpen aınalysýyna da múmkindik jasalǵan. Aýlada fýtbol, basketbol alańdary, júgirý jolaǵy, tennıs jáne shahmat ústelderi ornatylǵan.
