Aqtóbede 60-tan astam shaǵyn bóget jóndeýdi qajet etip tur
AQTÓBE. KAZINFORM — Aldymen byltyr qurylǵan gıdrotehnıkalyq qurylǵylarǵa qyzmet kórsetý mekemesine tehnıka satyp alynady. Sodan keıin ǵana 64 shaǵyn bógetke kezeń-kezeńimen jóndeý júrgiziledi.
Aqtóbe oblysynda qazirgi kezde 206 gıdrotehnıkalyq qurylys bar. Onyń 10-y respýblıkalyq, 174-i kommýnaldyq, al 22-i jeke menshikte. Byltyr óńirde Aqtóbe oblysynyń gıdrotehnıkalyq qurylǵylarǵa qyzmet kórsetý mekemesi quryldy. Dál osy mekeme bógetterdiń tehnıkalyq jaǵdaıyn zerttep, keıin ony jóndeýge mindetti.
Ázirge mekemeniń óziniń materıaldyq-tehnıkalyq bazasy jutań. Byltyr 84,7 mln teńgege 1 jersorǵysh snarıad satyp alynyp, Sazdy ózeninde qamysty tazartty.
Aqtóbe oblystyq tabıǵı resýrstar jáne tabıǵatty paıdalanýdy retteý basqarmasynyń habarlaýynsha, barlyǵy 72 tehnıka kerek. Bıyl oblystyq bıýdjetten 9 arnaıy tehnıka satyp alý úshin 355 mln teńge bólinip, konkýrsqa qujat ázirlenip jatyr. Budan bólek lızıng arqyly 2,2 mlrd teńgege 36 arnaıy tehnıka alý josparlandy.
— Bıyl 6 gıdrotehnıkalyq qurylysqa kópfaktorly zertteý júrgizý qajet. Sol kezde bógetterdiń jaǵdaıy tekseriledi. Jalpy táýelsizdik alǵan jyldary bógetterdiń qurylysy, ondaǵy jóndeý jumystary kóp bolǵan joq. Sol sebepti shaǵyn bógetterdiń jaǵdaıy tómen. Oblysta 60-tan astam bógetti jóndeý qajet dep sanap otyrmyz. Ony bir jylda jasaý múmkin emes. Kezeń-kezeńimen atqarylady. Sony jóndep, halyq ıgiligine berý kerek, — dedi Aqtóbe oblystyq tabıǵı resýrstar jáne tabıǵatty paıdalanýdy retteý basqarmasynyń basshysy Isataı Espaǵanbetov.
Bıyl Aqtóbede Qarǵaly sý qoımasy jóndeledi. Sonymen birge Sý salasyn damytýdyń 2024-2028 jyldarǵa arnalǵan keshendi josparyna sáıkes óńirde 2 jańa sý qoımasy salynady. Jaman Qalǵaly ózeninde Ólke, Or ózeninde Jambyl sý qoımasyn salý úshin jobalyq-smetalyq qujat ázirlendi.
— Oblysta Álııa jáne Jaryq sý qoımalaryn salý josparda bar. Jaryq bógeti Elek ózeniniń bastaýynda bolady. Bul Aqtóbe sý qoımasyna keletin sýdyń kólemin retteýge múmkindik beredi. Álııa aýylynda Álııa sý qoımasyn salý josparda bar. Bul Qobda aýdanyndaǵy sý tasqynynyń aldyn alýǵa septigin tıgizedi. Qazir qujat memlekettik saraptamadan ótip jatyr. Qurylys 2027-2028 jyldary júredi dep jospar quryp otyrmyz, — dedi Isataı Espaǵanbetov.
Eske salsaq, mınıstrlik jospary boıynsha Qarǵaly sý qoımasynyń eskirgen barlyq mehanızmi aýystyrylady, olardyń keıbiri 50 jyldan beri paıdalanylyp keledi.
Sonymen qatar gıdrotehnıkalyq nysandarǵa energııa qamtamasyz etý úshin shaǵyn sý elektr stantsııasy ornatylady. Al artyq energııa jergilikti kásipkerlikti jáne kórshi eldi mekenderdi qamtamasyz etý úshin qoldanylady.