Aqtóbede 60 otbasy apatty úıde janyn shúberekke túıip otyr

 AQTÓBE. QazAqparat - Aqtóbede 2-3 qabatty apatty úıdiń turǵyndary búgin taǵy kómek surady. Olar 20 jyl boıy ákimdikke máseleni aıtyp,  janyn shúberekke túıip otyr, dep habarlaıdy QazAqparat tilshisi.

 Aqtóbe qalasyndaǵy Chekalın kóshesiniń turǵyndary búgin ákimdikten taǵy da kómek surady. Turǵyndar apatty úıdiń máselesin 20 jyldan beri kóterip, ákimderge ótinish jazýmen keledi. Jyl ótken saıyn úılerdiń qabyrǵasy sógilip, shatyry tesilip jatyr. Al káriz qubyrlary jıi jarylady. 

«Buryn bul úılerdiń bári túrme ákimshiligine qarady. Bul jerde túrme qyzmetkerleri turdy, al tómengi qabatta nan pásirilip, sheberhana, dúken jumys istedi. Al qazir bárine adamdar qonystanǵan, men de nemerem úshin 2,5 mıllıon teńgege bir bólme satyp aldym. Kóbine áleýmettik jaǵdaıy tómen otbasy turady. Biraq jyl ótken jaıy úıdiń jaǵdaıy qıyndap barady. Ákimder kelip, bul úıler apatty dep tanyldy. Sonymen qatar, jeke kompanııalar baǵalady. Bar bolǵany 1,5-1,7 mıllıon teńge dep otyr. Oǵan eshkim kelispeıdi. Sebebi, biz ol qarjyǵa páter satyp ala almaımyz. Bári sóz kúıinde qalyp, kásipkerler de kelýin toqtatty», - dedi Lıýdmıla Fýrsova. 

Qazirgi kezde Chekalın kóshesindegi 5 úı apatty jaǵdaıda tur. Onda 60-tan astam otbasy turady. Bala-shaǵaly otbasy bir kúni úıindiniń asynda qalamyz dep qorqady.

«Men osy úıde 18 jyldan beri turamyn. Úı eski bolsa da eshkimge shaǵym aıtyp, kómek suramas edik. Biraq bizdiń podezde páter órtenip, kórshimizdiń esigi qulyptaýly tur. Al ekinshi qabattaǵy adam sol órttiń kesirinen baspanasynan aıyryldy. Sebebi, eden aǵash, al órt kezinde aǵash janyp ketip, páterdiń ishi tesilip qaldy. Qazir terezelerdegi áınek synyp, dala kórinip tur. Úıimiz salqyn. Qysta edendi basyp, júre almaı búrseńdep otyramyz. Nemerelerim aýrý bolyp, emhanadan shyqpaıdy. Endi qaıda baramyz?», -  deıdi turǵyn Raısa Baqtybaeva.

Aıta keteıik, Aqtóbe qalasy boıynsha 16 apatty turǵyn úı bar. Barlyǵy 247 kóne úı tirkelgen. Qazirgi kezde Eset batyr kóshesindegi apatty úı buzylyp, ornyna 9 qabatty úıdi salý jumysy bastaldy. 

«Aqtóbe qalasyndaǵy Chekalın kóshesiniń úıleri apatty jaǵdaıda. Apatty úılerdiń ornyna jańasyn salý týraly usynystar iri qurylys kompanııalaryna berildi. Birneshe kompanııa qarap, tanysty. Biraq eshqaısysynan jaýap joq», - deıdi Aqtóbe qalalyq turǵyn úı qatynastary bólimi basshysynyń orynbasary Erlan Ramazanov.